ബഹിരാകാശചരിത്രം തൊട്ട് സ്റ്റാർഷിപ്

പൂർണമായി പുനരുപയോഗിക്കാവുന്ന ആദ്യ ബഹിരാകാശവാഹനം

- അജീഷ് മുരളീധരൻ

ലോകത്തെ ഏറ്റവും വലുതും ശക്തിയേറിയതുമായ റോക്കറ്റ് ജൂൺ 6ന് വിജയകരമായി ബഹിരാകാശത്ത് എത്തി ഭൂമിയിൽ സുരക്ഷിതമായി തിരിച്ചെത്തിയപ്പോൾ ബഹിരാകാശദൗത്യങ്ങളിൽ പുതിയൊരു ചരിത്രമാണു പിറന്നത്.

ആഗോള സംരംഭകൻ ഇലോൺ മസ്കിന്റെ ബഹിരാകാശ കമ്പനിയായ സ്പേസ് എക്സ് വിക്ഷേപിച്ച "സ്റ്റാർഷിപ്' എന്ന റോക്കറ്റാണ് ഈ ചരിത്രദൗത്യത്തിന്റെ ഭാഗമായത്. പൂർണമായി പുനരുപയോഗിക്കാവുന്ന ലോകത്തെ ആദ്യ ബഹിരാകാശ വാഹനമാണിത്.

ബഹിരാകാശയാത്രകളുടെ ചെലവ് ഗണ്യമായി കുറയ്ക്കാനും കൂടുതൽ ഭാരമുള്ള വസ്തുക്കൾ ബഹിരാകാശത്ത് എത്തിക്കാനും സ്റ്റാർഷിപ് പൂർണസജ്ജമാകുന്നതോടെ കഴിയും. യുഎസിലെ ടെക്സസിൽ ബോക്ക ചിക്കയിലെ സ്പേസ് എക്സ് വിക്ഷേപണത്തറയിൽ നിന്നാണു "സ്റ്റാർഷിപ്' കുതിച്ചുയർന്നത്. 2026ൽ മനുഷ്യനെ ചന്ദ്രനിലേക്ക് അയയ്ക്കാനുള്ള നാസയുടെ ആർട്ടി മിസ്-3' ദൗത്യത്തിൽ സ്റ്റാർഷിപ് ഉപയോഗിക്കുമെന്നാണു കരുതുന്നത്.