ഒറ്റവരിയിൽ ഓടുന്ന മഹാത്ഭുതം

പ്രശസ്ത എഴുത്തുകാരൻ യു കെ കുമാരൻ സ്വന്തം സൈക്കിളനുഭവം പങ്കുവെയ്ക്കുന്നു

-  യു.കെ. കുമാരൻ

അക്കാലത്ത് തച്ചൻ കുന്നിൽ സൈക്കിളുകളാണ് അധികവും നിരത്തിലുണ്ടായിരുന്നത്. വല്ലപ്പോഴെങ്കിലും പൊടിപാറിച്ചുകൊണ്ട് കാറുകൾ ഓടുന്നത് കാണാം. കാലത്തും വൈകീട്ടുമായി നാല് ബസ്സുകളാണ് അതുവഴി ഓടിയിരുന്നത്. സൈക്കിളുകൾ വാടകയ്ക്ക് കൊടുക്കുന്ന ഒന്നു രണ്ടു കടകളും തച്ചൻ കുന്നിൽ ഉണ്ടായിരുന്നു. മണ്ണു നിറഞ്ഞ നിരത്തിലൂടെയും, ഇടവഴിയിലൂടെയും സൈക്കിളുകൾ പോകുമ്പോഴൊക്കെ ഞാൻ അത്ഭുതത്തോടെ നോക്കി നിന്നിട്ടുണ്ട്. തനിയെ നിൽക്കാൻ കഴിയാത്ത ഒരു വാഹനം എങ്ങിനെയാണ് ഓടുമ്പോൾ ഇങ്ങനെ വീഴാതെ മുന്നോട്ട് പോകുന്നത്?

എന്റെ ഏറ്റവും അടുത്ത കൂട്ടുകാരനായ ശ്രീധരൻ വലിയ ഒരു സൈക്കിൾ പ്രേമിയായിരുന്നു. എവിടെ നിന്നെങ്കിലും ഒരു സൈക്കിൾ സംഘടിപ്പിച്ച് നാട്ടിലെ ഇടവഴിയിലൂടെ പോവുക എന്നത് അവന്റെ ഏറ്റവും വലിയ വിനോദമായിരുന്നു. അച്ഛൻ വീട്ടിലില്ലാത്ത ദിവസങ്ങളിൽ ശ്രീധരനോടിക്കുന്ന സൈക്കിളിന്റെ ക്യാരിയറിലിരുന്നു ഞാനും ഇടവഴികളിലൂടെ യാത്ര പോകും. എനിക്ക് സൈക്കിൾ ഓടിക്കാൻ അറിയുമായിരുന്നില്ല. അത് പഠിക്കാനുള്ള അനുവാദം വീട്ടിൽ നിന്നും കിട്ടിയിരുന്നുമില്ല. എങ്കിലും സൈ ക്കിൾ എന്റെ മനസ്സിൽ വലിയൊരാവേശമായി പടർന്നുകയറുകയായിരുന്നു, നാട്ടിലെ നിരത്തിലൂടെയും, ഇടവഴിയിലൂടെയും ശ്രീധരനെപ്പോലെ സൈക്കിളും ചവിട്ടി പോകണം. ആയിടക്കാണ് തച്ചൻ കുന്നങ്ങാടിയിൽ ഒരു സൈക്കിൾ യജ്ഞക്കാരൻ വന്നത്. പട്ടരുടെ ബാങ്ക് പ്രവർത്തിച്ചിരുന്ന പഴയ കെട്ടിടത്തിന്റെ ഒഴിഞ്ഞ സ്ഥലത്ത് വെച്ചാണ് സൈക്കിൾ യജ്ഞം നടക്കുന്നത്. സൈക്കിളിൽ ഇരു ന്നും, മലർന്നു കിടന്നും, നിന്നും അയാൾ പലവിധ അഭ്യാസങ്ങൾ കാണിക്കുന്നു. ഞാ നും ശ്രീധരനും ആൾക്കൂട്ടത്തിന്റെ മുമ്പിൽ നിന്നു അത് കണ്ടുകൊണ്ടിരിക്കെ പെട്ടെന്ന് അയാൾ വിളിച്ചു പറയുന്നു.