ഒരു ജീവിതം അഞ്ച് ഭാര്യമാർ, അതാണ് നാഗേന്ദ്രൻസ് ഹണിമൂൺസ്

ഒരോ സ്ത്രീയും ഓരോ നാടിന്റേയും കൂടി ജീവിതത്തെ സ്ക്രീനിലെത്തിക്കുന്നുണ്ട്.

വെള്ളായണിക്കാരനായ നാഗേന്ദ്രന്റെ കഥപറയുന്ന നാഗേന്ദ്രൻസ് ഹണിമൂൺസ് എന്ന വെബ് സീരീസ് പ്രേക്ഷകർ ഏറ്റെടുത്തിരിക്കുകയാണ്. സുരാജ് വെഞ്ഞാറമൂടാണ് നാഗേന്ദ്രന്റെ കഥാപാ ത്രത്തെ അവതരിപ്പിക്കുന്നത്. ഡിസ്നി പ്ലസ് ഹോട്ട് സ്റ്റാറിലാണ് സീരീസ് റിലീസായത്. ചിത്രത്തിന്റെ ട്രെയിലർ ഇറങ്ങിയപ്പോൾ തന്നെ ഏറെ ആകാംഷയോടെയായിരുന്നു പ്രേക്ഷകർ കാത്തിരുന്നത്. ആ കാത്തിരിപ്പ് വെറുതെ ആയില്ല എന്നതാണ് ചിത്രത്തിന്റെ വിജയം സൂചിപ്പിക്കുന്നത്. ഒരു ജീവിതം അഞ്ചു ഭാര്യമാർ എന്ന ടാഗ് ലൈനോടു കൂടിയാണ് ചിത്രം എത്തിയിരിക്കുന്നത്. തമാശയും ജീവിതയാഥാർത്ഥ്യങ്ങളും ഇടകലർന്ന നാഗേന്ദ്രന്റെ കഥയാണ് ചിത്രം പറയുന്നത്.

1970കളിലെ കഥയാണ് സീരിസിന്റെ ഇതിവൃത്തം. സുരാജിന്റെ അഭിനയ ജീവിതത്തിലെ മറ്റൊരു നാഴികക്കല്ലു കൂടിയാവുകയാണ് ഈ സീരസ്, നായക വേഷങ്ങളുടെ അതിഭാവുകത്വങ്ങളോ ഏച്ചുകെട്ടലോയില്ലാത്ത ഒരു കഥാപാത്രം അങ്ങനെവേണം നാഗേന്ദ്രനെ വിശേഷിപ്പിക്കുവാൻ. നോട്ടത്തിലും ശരീരഭാഷയിലും എല്ലാം തികഞ്ഞൊരു നാഗേന്ദ്രനായി കഥയിൽ സുരാജിന് ജീവിക്കാനായി എന്നതും എടുത്തുപറയേണ്ടതുണ്ട്. സുരാജിന്റെ ശൈലിയിലുള്ള നർമ്മ നിമിഷങ്ങളും പ്രേക്ഷകരെ ചിത്രം തീരുംവരെ കാണാൻ പ്രേരിപ്പിക്കുന്നുണ്ട്.