ભાજપ કહેઃ મેં બનાવ્યું છે ગુજરાતકોંગ્રેસ કહેઃ પરિવર્તન હશે દમદાર

ગુજરાત વિધાનસભાની ચૂંટણીનો માહોલ બંધાઈ રહ્યો છે. લાંબા સમયથી ભાજપ અને કોંગ્રેસ એ બે જ પક્ષ વચ્ચે લડાતું આ યુદ્ધ આ વખતે ‘આમ આદમી પાર્ટી’ના આગમનને કારણે રસપ્રદ બનવાની એંધાણી છે.

- કેતન ત્રિવેદી (અમદાવાદ)

ગુજરાત વિધાનસભાની ચૂંટણીની સત્તાવાર જાહેરાત થવાની સાથે જ ગુજરાતમાં રાજકીય ગતિવિધિઓ અત્યંત તેજ બની ચૂકી છે. ત્રિપાંખિયો જંગ બનાવીને આ ચૂંટણીને રસપ્રદ બનાવનારી આમ આદમી પાર્ટીએ મોટા ભાગના ઉમેદવારો જાહેર કરી દીધા છે તો ચિત્રલેખાનો આ અંક તમારા હાથમાં હશે ત્યારે સૌરાષ્ટ્ર-કચ્છ અને દક્ષિણ ગુજરાતના પહેલા તબક્કાના જંગ માટે ભાજપ-કોંગ્રેસના ઉમેદવારોની યાદી પણ બહાર પડી ચૂકી હશે અને ૧ ડિસેમ્બરે યોજાનારા મતદાનના પહેલા તબક્કાના ઉમેદવારોનું ચિત્ર લગભગ સ્પષ્ટ થવામાં હશે.

ખેર, છોડો એ બધી વાતને. આ બધા ન્યૂઝ તો અખબારો-ટીવીચૅનલો અને સોશિયલ મિડિયામાંથી મળતા રહેશે, પણ મંગળવાર, ૮ નવેમ્બરની બપોરે આ લખાઈ રહ્યું છે ત્યારે ગુજરાતના ચૂંટણીજંગમાં નજર આવતાં બે-ત્રણ મહત્ત્વનાં અને રસપ્રદ તારણોની જ વાત અહીં કરવી છે આજે.

એક વાત તો નક્કી છે કે આ વખતે સાવ નીરસ લાગતી ચૂંટણી અરવિંદ કેજરીવાલ ઍન્ડ કંપનીના આવવાથી રસપ્રદ બની છે. અન્યથા, જો ભાજપકોંગ્રેસ વચ્ચે જ જંગ હોત તો જે ઝનૂન, જે ઉત્સાહ અને જે સ્પર્ધા ૨૦૧૭ની ચૂંટણીમાં જોવા મળી હતી એનો આ વખતે બન્ને પક્ષમાં સદંતર અભાવ હતો.

ચૂંટણી છે એટલે પ્રચાર માટેનાં અમુક સૂત્રો અને થીમ જાહેર થાય એ ન્યાયે દક્ષિણ ગુજરાતના કપરાડામાં પહેલી ચૂંટણીસભા સંબોધતી વખતે વડા પ્રધાન નરેન્દ્ર મોદીએ આ મેં બનાવેલું ગુજરાત છે.. એવું સ્લોગન વહેતું મૂક્યું છે. આશય સાફ છેઃ દરેક મતદાતાને ગુજરાત, ગુજરાતના ગૌરવ સાથે જોડીને ભાજપ સાથે ભાવનાત્મક રીતે જોડાયેલો રાખવાનો. એની સામે કોંગ્રેસે પરિવર્તન સંકલ્પ યાત્રા દરમિયાન જ પરિવર્તન દમદાર એવું કહીને મતદારોને સત્તા પરિવર્તનની અપીલ કરી છે.

ભાજપના પ્રચારનો દારોમદાર નરેન્દ્ર મોદી પર છે તો કોંગ્રેસે ‘પરિવર્તન યાત્રા’ અને વ્યક્તિગત સંપર્કથી મતદારો સુધી પહોંચવાનું ઠેરવ્યું છે.