મહારાષ્ટ્રના મહાયુદ્ધમાં જીતે કોઈ પણ, મતદારો હારશે!

પરિણામ પછી કયો પક્ષ કે કયો નેતા કોની સાથે જશે એની અટકળની પતંગ ચગાવવાનો કોઈ અર્થ નથી. રાજકારણીઓ કોઈ પણ ભોગે પ્રજાને ખોટી જ પાડશે.

- હીરેન મહેતા

ઉમેદવારોની આવી ખીચડી ભાગ્યે જ કોઈ રાજ્યની પ્રજાએ જોઈ હશે. જ ગણિત સાફ છે. એક સામે એક એવું સમીકરણ છે. હા, થોડા નાના-છૂટાછવાયા પક્ષો તથા કેટલાક બળવાખોર ઉમેદવારો પણ છે ખરા. જો કે ખરી લડત આ બધા વચ્ચે નહીં, પરંતુ બે યુતિ વચ્ચે છે અને એમાં પણ અંદરોઅંદર સાથી પક્ષો વચ્ચે છે.

ચિત્રલેખાનો આ અંક વાચકોના હાથમાં હશે ત્યારે મહારાષ્ટ્રની નવી વિધાનસભા માટે મતદાન પૂરું થઈ ગયું હશે અને એનાં પરિણામની રાહ જોવાતી હશે. રવિવારે આવનારાં પરિણામ વિશે અટકળ પણ ઘણી થઈ રહી છે, પરંતુ દરેક વખત ચૂંટણીના વરતારા સાચા પડતા નથી અને વરતારા સાચા પડે તો પણ પરિણામોની પછવાડે જે રમત રમાતી હોય છે એના આધારે નવી સરકાર કોની બનશે એ નક્કી થતું હોય છે.

અને મહારાષ્ટ્રની જનતાને વિધાનસભાની છેલ્લી ચૂંટણીમાં એનો અનુભવ થઈ જ ગયો છે. ભાજપ અને અવિભાજિત શિવસેના સાથે મળીને ચૂંટણી લડ્યાં, પરંતુ મુખ્ય પ્રધાનની ગાદી માટે બન્ને ઝઘડ્યાં અને છૂટાં પડી ગયાં. એ પછી તો ન થવાનું થયું. ભાજપે શરદ પવારના અતિ મહત્ત્વાકાંક્ષી ભત્રીજા અજિત પવારને ફોડ્યા અને એક સવારે કૂકડાને બોલવાનો મોકો મળે એ પહેલાં એમની સાથે ઘરઘરણું કરી લીધું. જો કે લગ્નની મેંદીનો રંગ ઊતરે એ પહેલાં શરદરાવ એમના ભત્રીજા અજિતને પાછા સ્વગૃહે લઈ ગયા અને એ સાથે મહારાષ્ટ્રની સૌથી ટૂંકી મુદતની સરકારનું આયખું પૂરું થયું.