દક્ષિણ ગુજરાત ભાજપના મતમાં આપ પડાવશે ભાગ?

સુરતમાં પાટીદારો આ વખતે કોની પડખે?: ભાજપના ઉમેદવાર કુમાર કાનાણી (વરાછા રોડ) તથા ‘આપ’ના ગોપાલ ઇટાલિયા (કતારામ).

- અરવિંદ ગોંડલિયા (સુરત)

સુરત મહાપાલિકાની ચૂંટણીમાં ૨૭ બેઠકો પર વિજય મેળવીને વિપક્ષમાં બિરાજેલી (આપ) હવે ગુજરાતની ગાદી માટે તનતોડ મહેનત અરવિંદ કેજરીવાલની આમ આદમી પાર્ટી કરી રહી છે. આ વિધાનસભા ચૂંટણીમાં આપનો ગજ વાગશે કે કેમ એ તો સમય નક્કી કરશે, પણ ચૂંટણીજંગમાં આપના આગમનથી ગુજરાતની ચૂંટણી ચર્ચાસ્પદ બની છે. બીજી તરફ, કોંગ્રેસ ઝાઝી ગાજવીજ વગર પ્રચાર કરી રહી છે. દક્ષિણ ગુજરાતની આદિવાસી બહુમત ધરાવતી બેઠકો પર હજી પણ કોંગ્રેસનો દબદબો છે, જ્યારે શહેરી વિસ્તારમાં આપનું ખાસ્સું જોર વધ્યું છે. આ કારણે ભાજપ માટે આ ચૂંટણી કપરાં ચઢાણ બની રહેશે એમાં કોઈ શંકા નથી.

દક્ષિણ ગુજરાતમાં વિધાનસભાની કુલ ૩૫ બેઠકો પૈકી પચ્ચીસ અત્યારે ભાજપ પાસે છે. જો કે હવે આપના આગમનથી ઘણાં સમીકરણ બદલાઈ શકે છે. ચાલો, જાણીએ દક્ષિણ ગુજરાતની પાંચ એવી બેઠક, જ્યાં ઘમાસાણ ચૂંટણીયુદ્ધ થવાનું છે અને કોઈ ને કોઈ રીતે એ બેઠક ચર્ચાના એરણે ચઢી છે.

વરાછા રોડ

૮૫ ટકાથી વધુ પાટીદાર વિસ્તાર ધરાવતો આ મતવિસ્તાર ભાજપનો ગઢ છે. ગત ચૂંટણીમાં પાટીદાર અનામત આંદોલન અને લોકોની ભાજપ પ્રત્યે નારાજગી વચ્ચે પણ કુમાર કાનાણીના નેતૃત્વમાં ભાજપે આ બેઠક કબજે કરી હતી. દબંગ ગણાતા કુમાર કાનાણીને જ ભાજપે રિપીટ કર્યા છે તો સામે આમ આદમી પાર્ટીમાંથી પાટીદાર આંદોલનનો  મહત્ત્વનો ચહેરો ગણાતા અલ્પેશ કથીરિયા છે.

આ બેઠક પર કોંગ્રેસે અગાઉના પાટીદાર આંદોલનકારી પ્રફુલ્લ તોગડિયા ઉર્ફે પપન તોગડિયાને કમાન સોંપી છે. ૨૦૨૧માં થયેલી સુરત મહાપાલિકાની ચૂંટણીમાં આ વિસ્તારની તમામ બેઠકો પર આપના ઉમેદવારો વિજયી થયા હતા, એનો ફાયદો પક્ષને મળી શકે. માત્ર સુરત નહીં, સમગ્ર દક્ષિણ ગુજરાતની આ સૌથી વધુ ચર્ચિત બેઠક છે.

કતારગામ