પાણીચું નહીં, પરોણાગત થાય છે આ કંપનીમાં

ભારતનાં ગામડાંમાં સિલિકોન વૅલી બનાવવાના સપના સાથે અમેરિકાથી ભારત પાછા ફરેલા ટેક્નોક્રેટ શ્રીધર વેમ્બુએ પાછલાં ૨૬ વર્ષમાં ‘ઝોહો કૉર્પોરેશન’ને અગ્રણી સૉફ્ટવેર કંપની બનાવવા સાથે કર્મચારીઓનો અદમ્ય વિશ્વાસ પણ સંપાદિત કર્યો છે.

- સમીર પાલેજા (મુંબઈ)

પદ્મશ્રી શ્રીધર વેમ્બુ ગામડે રહીને અબજો રૂપિયાની કંપનીના સંચાલન ઉપરાંત શોખથી ખેતીવાડી પણ કરે છે.

માર્ચ ૨૦૨૦...

કોવિડનો કાળમુખો રાક્ષસ ભલે ગમે એટલું આર્થિક સંકટ વકરાવે, પણ મારા પ્રિય કર્મચારીઓ, તમને ખાતરી આપું છું કે તમારી છટણી કોઈ પણ ભોગે નહીં કરીએ.

આવો સધિયારો આપીને શ્રીધર વેમ્બુએ લૉકડાઉનનાં બે સપ્તાહ પહેલાં જ ઑફિસ બંધ કરીને કર્મચારીઓને ઘરે મોક્લવા માંડ્યા, જેથી છેલ્લી ઘડીએ કોઈ અટકે નહીં. લૉકડાઉનમાં એમણે વર્ક ફ્રૉમ હોમ . કલ્ચરથી આખો કારોબાર ચલાવ્યો. એટલું જ નહીં, કોવિડને કારણે આર્થિક અગવડમાં સપડાયેલા પોતાના સેંકડો કસ્ટમર્સને પણ એમણે સાચવી લીધા. પછી કોવિડનો પ્રકોપ ઢીલો થયો ને માર્કેટ ખૂલવા માંડી ત્યારે આ દિલદાર માણસને પોતાની પ્રોડક્ટ્સનું નવેસરથી માર્કેટિંગ કરવાની આવશ્યકતા જ ન રહી, કેમ કે ગ્રાહકોએ જ એ કામ કરી કે નાખ્યું.

આવી અનોખી બિઝનેસ સેન્સ ધરાવનારા શ્રીધર વેમ્બુ ભારતની અગ્રણી સૉફ્ટવેર કંપની ઝોહો કૉર્પોરેશનના સંસ્થાપક અને સીઈઓ છે. ૨૦૨૧માં એમની કંપનીએ યુનિકૉર્ન (એક અબજ ડૉલરનું વૅલ્યુએશન)નું સ્ટેટસ મેળવ્યું. અત્યારે ઝોહો પાંચ હજાર કરોડ રૂપિયાથી વધુની આવકે પહોંચી ચૂકી છે. દુનિયાના તવંગરોની ફોર્બ્સ મૅગેઝિનની યાદી પ્રમાણે શ્રીધરજીનો નંબર પંચાવનમો છે. ગયા વર્ષે એમને ભારત સરકારે પદ્મશ્રી એવૉર્ડથી સમ્માનિત કર્યા.

તાજેતરમાં મુંબઈ, દિલ્હી, બેંગલુરુ અને ઉત્તર પ્રદેશના વીજળીક પ્રવાસે નીકળેલા શ્રીધરઅન્નાએ અનેક લેક્ચર્સમાં આગાહી કરી કે ટેક સેક્ટરની મંદીનો આરંભ થઈ ચૂક્યો છે અને વધુ ખરાબ દિવસો આવી શકે છે. આ વાસ્તવિકતા સામે આગોતરી તૈયારી રૂપે ઝોહોએ નવી ભરતી મર્યાદિત કરી નાખી છે, પણ હકાલપટ્ટી પર તો ચોકડી જ છે. શ્રીધરનો તર્ક એ છે કે કર્મચારીઓ કંપનીને વફાદાર રહે તો નોકરીદાતાએ પણ એમના તરફ વફાદારી દાખવવી જોઈએ.