મહાભારત માર્ગદર્શક મહાકાવ્ય

જન્મતાંની સાથે ગરુડે આકાશમાં ઉડાન ભરી. એમનું ભડભડતું તેજ એટલું બધું પ્રભાવશાળી અને ડરામણું હતું કે આ અગ્નિપુંજને જોઈને દેવો ડરી ગયા. એમને લાગ્યું કે અગ્નિદેવ કોપાયમાન થયા લાગે છે.

- દીપક સોલિયા

એક મસમોટું પક્ષી છે. એના પર એક સુંદર યુવતી બેઠી છે. યુવતી એ મહાપક્ષીને એક શહેર પરના આકાશમાં દોરી જાય છે. પછી સામાન્ય માણસ જે રીતે પાળીતા કૂતરાને શ્યો.. કહીને કોઈની પાછળ છોડી મૂકે એવી રીતે આ યુવતી પેલા મહાપક્ષીને આખું શહેર બાળી મૂકવાનો આદેશ આપે છે.

અલબત્ત, આ કોઈ સત્યઘટના નથી. આ એક કથા છે. જ્યોર્જ આર.આર. માર્ટિન નામના લેખકે અ સોન્ગ ઑફ આઈસ ઍન્ડ ફાયર (બરફ અને અગ્નિનું ગીત) નામની એક નવલકથા શ્રેણી લખેલી. એમાંની પહેલી નવલકથાનું શીર્ષક હતું ગેમ ઑફ થ્રોન્સ (ગાદીઓની રમત). આ નામ મોટે ભાગે તમે સાંભળ્યું હશે, કારણ કે આ નામની એક ટીવીશ્રેણી ઓટીટી પ્લૅટફૉર્મ પર ૨૦૧૧થી ૨૦૧૯ દરમિયાન ટુકડે ટુકડે ૭૩ એપિસોડ્સમાં રજૂ થયેલી. આ અતિ ભવ્ય અને શાનદાર શ્રેણીમાં પેલું મહાપક્ષી એની અસવાર નાયિકાના આદેશ મુજબ આખું શહેર બાળીને ખેદાનમેદાન કરી મૂકે છે. એ ઘટનાક્રમનું ચિત્રણ એટલી ગજબનાક રીતે રજૂ થયું છે કે એ જોનારાના શ્વાસ થંભાવી શકે છે. એ પ્રચંડ ડ્રૅગન (ઊડતું સરિસૃપ) આગની મહાકાય જ્વાળાઓ છોડે, એના મોટા મોટા ઉચ્છ્વાસથી વાવાઝોડાં ફૂંકાય.. એ આખી રજૂઆત ટીવીશ્રેણીમાં એટલી માતબર છે કે એને એક વાર જોનારા લોકો જીવનભર ન ભૂલી શકે.

અલબત્ત, આપણે વાત કરી રહ્યા છીએ મહાભારતની, પરંતુ એમાં વચ્ચે એ ટીવીશ્રેણી અને એ મહાપક્ષી યાદ આવવાનું કારણ એ કે એક રીતે જોતાં એ આખી શ્રેણી મહાભારત જેવી છે. ખૂબ બધી વાર્તાઓનો મસ્ત સરવાળો અને પેલું પક્ષી મહાભારતના ગરુડરાજની યાદ અપાવે એવું છે.

ફરક એટલો કે એ ટીવીશ્રેણીની કથા અતિ વ્યાપક હોવા છતાં સરવાળે તો એને લઘુ મહાભારત જ ગણી શકાય એવી છે અને એમાંનું પેલું ડ્રૅગન અતિ વિરાટ-વિકરાળ હોવા છતાં મહાભારતના ગરુડરાજની સરખામણીમાં એ સાવ નાનકડું, કહો કે મચ્છર જેવડું લાગી શકે.

અહીં ઈરાદો એ શ્રેણીને કે એમાંના ડ્રૅગનને ઉતારી પાડવાનો નથી. ઈરાદો ગરુડની પ્રચંડતાનો અંદાજ આપવાનો છે. જે પ્રચંડ ડ્રૅગન દ્વારા વેરવામાં આવેલા મહાવિનાશનું ચિત્રણ ટીવીજગતની ઉત્તમોત્તમ રજૂઆતોમાં સ્થાન પામી શકે એવું છે એ મહાકાય ટ્રૅગન જો મહાભારતના ગરુડરાજની સરખામણીમાં મચ્છર જેવડું લાગી શકતું હોય તો વિચારો કે એ ગરુડરાજ કેટલા પ્રચંડ હશે!

આવો, જાણીએ..