ટાઈગર મર ગયા, મગર આરોપી પકડ લિયા..

વાઘ મૂળ બંગાળનો, શિકાર મહારાષ્ટ્રમાં, આરોપી હરિયાણાના અને પકડાયા આસામથી. આવો વિચિત્ર ગુનો ઉકેલવામાં ગુજરાતના એક નિવૃત્ત પોલીસ અધિકારીની ભૂમિકા ચાવીરૂપ રહી. જઈએ, આ અપરાધકથાની ભીતરમાં.

- મહેશ શાહ (અમદાવાદ)

ગયા મહિનાની વાત. ગુજરાતના પાટનગર ગાંધીનગરમાં રહેતા રાજ્યના નિવૃત્ત ડિરેક્ટર જનરલ ઑફ પોલીસ (ડીજીપી) કેશવ કુમારે આસામના એક ઉચ્ચ પોલીસ અધિકારીને ફોન પર કહ્યું: ‘થોડા દિવસ પહેલાં મહારાષ્ટ્રના ચંદ્રપુર નજીકના જંગલમાં એક વાઘનો શિકાર થયો હતો. એ વાઘનું ચામડું, હાડકાં, દાંત વેચવા અમુક લોકો તમારે ત્યાં કોઈ ગામમાં આવ્યા છે.. આવી માહિતી મારી પાસે આવી છે.’

આસામના પોલીસ અધિકારી ચોંકી ગયા. એમણે તરત પોતાના વિભાગને આ મામલાની તપાસનો આદેશ આપ્યો. પછીના દિવસોમાં કેશવ કુમારે ફરી પેલા અધિકારીને ફોન કરીને આરોપીઓનું લોકેશન આપ્યું. એ ટિપના આધારે આસામના ગુવાહાટીના અઝારા પોલીસસ્ટેશનના અધિકારીઓએ ધારપુર જિલ્લાના મેજેલી ગામમાં એક મકાન પર ત્રણેક દિવસ વૉચ રાખી. ત્યાં છુપાયેલા લોકો અને એમની પાસેથી વાઘનું ચામડું ખરીદવા આવનારા એ બન્નેને સાથે પકડવાનો પ્લાન હતો. જો કે ખરીદનાર ન આવ્યો એટલે ૨૮ જૂને ભાડાના ઘરમાં છાપો મારીને હરિયાણાવાસી ઓમપ્રકાશ (૪૫), રામુ દાસ (૪૦) તથા માયાદેવી, રાજવતી સહિત પાંચની ધરપકડ કરીને વાઘનું નવેક ફૂટ લંબાઈનું ચામડું તથા વીસેક કિલો હાડકાં અને દાંત જપ્ત કર્યાં. આરોપીઓ સામે વાઈલ્ડલાઈફ પ્રોટેક્શન મુજબ ગુનો નોંધવામાં આવ્યો. શિકાર કરવામાં આવેલો વાઘ બેંગાલ ટાઈગર હોવાનું અનુમાન છે.

પ્રાથમિક પૂછપરછમાં આરોપીઓએ દાવો કર્યો અમને બિહારથી આ કન્સાઈનમેન્ટ મળ્યું, એ બદલ પચ્ચીસ હજાર રૂપિયા મળવાના હતા. શિલોંગનો એક રહેવાસી આ કન્સાઈનમેન્ટ ૧૭ લાખમાં લેવા આવવાનો હતો.

જો કે શિલોંગવાસી વ્યક્તિ આવે એ પહેલાં આસામ પોલીસે પહોંચી ગઈ. જાણવા મળ્યા મુજબ, વાઘનું ચામડું અને હાડકાં, વગેરે અવશેષો આસામથી શિલોંગ અને મ્યાનમારથી નેપાળ થઈને વિદેશમાં મોકલવાનો પ્લાન હતો. આંતરરાષ્ટ્રીય બજારમાં એની અંદાજિત કિંમત પાંચેક કરોડ રૂપિયા થતી હોવાનું અનુમાન છે. જો કે ગુજરાત પોલીસના નિવૃત્ત અધિકારી કેશવ કુમારની માહિતી અને માર્ગદર્શનના લીધે વાઘનાં ચામડાં અને હાડકાંની આંતરરાષ્ટ્રીય તસ્કરીનો પ્લાન ચોપટ થઈ ગયો.