પાંચ હજાર કરોડ રૂપિયાનું સટ્ટા-સામ્રાજ્ય સર્જનારો સૌરભ છે કોણ?

‘મહાદેવ’ નામે સટ્ટાબાજી કરી ભલભલાને બાટલીમાં ઉતાર્યા, લગનમાં કર્યો બે અબજનો ધુમાડો.. છત્તીસગઢના આ ટપોરીબાજની સત્ય કથા હેરતંગેઝ છે.

- કેતન મિસ્ત્રી (મુંબઈ)

એકએકથી ચડિયાતા સ્ટાર્સ, લોકપ્રિય ગાયક-ગાયિકા, દિલડોલ સંગીત અને ઉપરથી ખડખડ હસાવતી કૉમેડી..

ના, આ કોઈ ફિલ્મની વાત નથી. આ તો દુબઈમાં યોજાયેલાં એક લગ્નની વાત છે, જેમાં આ બધું હતું અને બીજુંય ઘણું હતું.. અને લગ્નનું બજેટ? ત્રણેક ફિલ્મ બની જાય એટલું!

ગયા ગુરુવારે એન્ફોર્સમેન્ટ ડિરેક્ટોરેટે (ઈડીએ) એક નવીનવાઈની કંપની, મહાદેવ ઑનલાઈન બુક બૅટિંગ ઍપના પ્રમોટર સૌરભ ચંદ્રાકર અને એના સટ્ટાબાજીના નેટવર્ક વિશે જે કહ્યું એ ચોંકાવી દે છે. પ્રથમ નજરે ઈડીને આ મની લોન્ડરિંગનો મામલો લાગે છે. અત્યારે ઈડી ઉપરાંત અનેક રાજ્યની પોલીસ આ મામલાની તપાસ કરી રહી છે. મની લોન્ડરિંગ એટલે ગેરરીતિનાં કાળાં નાણાંને ધોળાં બનાવવાનું કર્મ. ગયા ગુરુવારે રાયપુર, ભોપાળ, મુંબઈ, કોલકાતામાં પાંત્રીસથી વધુ જગ્યાએ દરોડા પાડીને ઈડીએ ૪૧૭ કરોડ રૂપિયા રોકડા જપ્ત કર્યા. કરોડોનું ગોલ્ડ અને બીજી મૂલ્યવાન ચીજો અલગ. કંપનીનાં બે મુખ્ય ભેજાં સૌરભ ચંદ્રાકર અને રવિ ઉપ્પલ વિરુદ્ધ રેડ કૉર્નર નોટિસ તથા બિનજામીનપાત્ર વૉરન્ટ બહાર પાડવામાં આવ્યાં છે.

બેગાની શાદીમાં નાચવાનું-ગાવાનું પડશે ભારે? રોકડા લઈને સૌરભનાં લગ્નમાં મહાલવા ગયેલી બોલીવૂડ સેલિબ્રિટીને આવશે ‘ઈડી’નાં તેડાં?