કોણ છે કરાચીની આ વડા-પાંઉ ગર્લ?

સોશિયલ મિડિયામાં અત્યારે એક વિડિયો ફરી રહ્યો છે, જેમાં પાકિસ્તાનની ગલીમાં સ્વાદપ્રેમી લોકો હિંદુસ્તાની ફડની લિજ્જત માણતાં દેખાય છે. ચાલો માણીએ, કરાચીવાસીઓની જીભે ઈન્ડિયન સ્ટ્રીટ ફડનો સ્વાદ વળગાડનારી મૂળ મોરબીની યુવતી સાથે એની સ્વાદસફર.

- હેતલ રાવ

પાકિસ્તાનના કરાચીમાં કેન્ટોન્મેન્ટ રેલવેસ્ટેશન વિસ્તારમાં સાંજે બરાબર સાંજે ભરાભરા છના ટકોરે પાંઉ-ભાજી, વડા-પાંઉ, દાલ-સમોસાં અને અન્ય ભારતીય ભોજનનો સ્ટૉલ લાગે એટલે સ્વાદરસિયા એની લિજ્જત માણવા ઊમટી પડે છે.

કરાચીવાસીઓને ઈન્ડિયન સ્ટ્રીટ ફૂડનું ઘેલું લગાડનારી યુવતીનું નામઃ કવિતા મોહનભાઈ સોલંકી. નામ વાંચીને વિચાર આવે કે આ યુવતી ગુજરાતી છે કે શું?

તો એનો જવાબ છે, હા, કવિતા ગુજરાતી જ છે.

કવિતા અને એનો પરિવાર કરાચીમાં કવિતા દીદી એક્સપ્રેસ કાર્ટ નામનો ફૂડ સ્ટૉલ ચલાવે છે, જે કવિતા દીદી કા ઈન્ડિયન ખાના નામથી વધારે લોકપ્રિય છે. કરામત ખાન નામના લોકલ ફૂડ બ્લોગરે સોશિયલ મિડિયા પર કવિતાની રસોઇનાં વખાણ કરતો એક વિડિયો મૂક્યો, જેમાં એણે કહ્યું કે કરાચીમાં ફૂડલવર્સ હિંદુ પારિવારિક ભોજનનો આનંદ માણે છે.

કવિતાનાં મૂળિયાં હિંદુસ્તાનમાં ભારતપાકિસ્તાનના ભાગલા થયા એ વખતે કવિતાના પૂર્વજ રોજગાર અર્થે મોરબીથી કરાચી જઈને વસ્યા. કવિતાના દાદા ભત્તુ સોલંકીએ પત્ની શાંતિ સાથે પરિવારને સૅટલ કરવા ઘણો સંઘર્ષ કર્યો. કવિતાનાં પિતા મોહનભાઈ અને માતા લલિતાબાઈ પણ ખૂબ મહેનતુ. પિતા કરાચીમાં ડ્રાઈવર તરીકે કામ કરે અને માતા બાળકોને ઉચ્ચ શિક્ષણ મળે એવા સતત પ્રયત્ન કરે. એમનાં ત્રણ સંતાન પૈકી કવિતા સૌથી નાની.

કરાચીની યુનિવર્સિટીમાંથી કૉમર્સના વિષય સાથે ગ્રેજ્યુએટ થયા બાદ કવિતાને સારી નોકરી મળી ગઈ. બધું સરસ ચાલી રહ્યું હતું... પણ તો પછી આ ફૂડ સ્ટૉલ?

કરાચીથી ટેલિફોનિક વાતચીતમાં પ્રિયદર્શિનીનું કુતૂહલ શમાવતાં કવિતા કહે છે: “જૉબમાં હું ખૂબ ખુશ હતી, પણ મારાં દાદીનું સપનું પૂર્ણ કરવા આઠ મહિના પહેલાં જ મેં ફડ સ્ટૉલ શરૂ કર્યો. હવે લાગે છે કે આ માત્ર મારાં દાદીનું જ નહીં, પણ કરાચીની સેંકડો મહિલાઓનું સપનું હતું...’