અવગણવા જેવી નથી આ વ્યાધિ

ગર્ભાવસ્થામાં એનિમિયા સ્ત્રી ઉપરાંત ગર્ભસ્થ શિશુના સ્વાસ્થ્ય સામે જોખમ ઊભું થાય એ પહેલાં ચેતી જાવ...

- ડૉ. અર્ચના પારસ શાહ

ગર્ભાવસ્થા એ દરેક સ્ત્રી માટેના સૌથી મહત્ત્વપૂર્ણ અને તબક્કાવાર સમયગાળામાંથી એક છે. આ ગાળા દરમિયાન સ્ત્રીના શરીરમાં અનેક શારીરિક ફેરફાર તો થાય જ છે, સાથે સાથે અમુક રાસાયણિક (એટલે કે કેમિકલહોર્મોનલ) ફેરફાર સુદ્ધાં થાય છે, જે બાળકના વિકાસ માટે જરૂરી હોય છે.

આપણે જાણીએ જ છીએ કે પ્રેગ્નન્સીના સમયગાળામાં સ્ત્રીએ એના સ્વાસ્થ્યનું ખાસ ધ્યાન રાખવું જરૂરી છે, ખાસ તો એક એવી સમસ્યાનું, જે આ ગાળામાં અનેક સ્ત્રીને પ્રભાવિત કરે છે. એ સમસ્યા છેઃ એનિમિયા.

એનિમિયા એ એવી પરિસ્થિતિ છે, જેમાં લોહીમાં હિમોગ્લોબિનનું પ્રમાણ ઓછું થઈ જાય છે. હિમોગ્લોબિન એ લોહીના રક્તકણોમાં રહેલું પ્રોટીન છે, જે ઑક્સિજનનું શરીરના વિવિધ ભાગોમાં વહન કરે છે. લોહીમાં હિમોગ્લોબિનની અછત થાય ત્યારે લોહી પૂરતો ઑક્સિજન પહોંચાડી શકતું નથી. ખોરાકમાં લોહતત્ત્વ (આયર્ન)ની ઊણપ એ એનિમિયાનું મુખ્ય કારણ છે.