સેવા-સુવિધાનો આ છે મહાકુંભ...

પ્રયાગરાજ સહિતનાં રેલવેસ્ટેશનના રિ-મોડેલિંગ કરવા ઉપરાંત મુલાકાતીઓ માટે અનેક સ્થળે ટેન્ટ સિટી ઊભી થઈ રહી છે, તો આખી ‘સંગમ નારી′ ઠેર ઠેર ભીંતચિત્રોથી સજી રહી છે. શ્રદ્ધાળુઓ પ્રચારારાજમાં અનેક પ્રાચીન મંદિરનાં દર્શન કરી શકશે.

- સમીર પાલેજા (મુંબઈ)

જનમ જનમ કે પુણ્ય ફલે, આઓ સબ મહાકુંભ ચલે... આ સૂત્ર લખેલાં બૅનર્સ આજે ઉત્તર પ્રદેશની ઐતિહાસિક નગરી પ્રયાગરાજમાં અનેક પ્રમુખ સ્થળે જોવા મળે છે. બૅનરના એક ખૂણે ત્રણ સ્કેન કોડ પણ છાપ્યા છે. જોઈએ એ સ્કેન કરો એટલે મહાકુંભને લગતી વિવિધ માહિતી મોબાઈલ પર ચમકે છે.

આંકડામાં જુઓ તો પાછલા કુંભમેળાનું બજેટ ૪૦૦૦ કરોડ રૂપિયાનું હતું અને એમાં ૧,૪૦,૦૦૦ કરોડ રૂપિયાનો ઊથલો થયો હતો. આ વખતે મહાકુંભમાં રાજ્ય સરકારે ૬૮૦૦ કરોડ રૂપિયાનું બજેટ રાખ્યું છે, જેમાંથી બે લાખ કરોડ રૂપિયાના રેવન્યૂ જનરેશનની આશા છે.

એકાદ મહિનામાં ૨૫ કરોડ લોકોની અવરજવર થવાની હોય એ શહેરની વ્યવસ્થા સંભાળવાનું પ્રશાસન માટે સહેલું ન હોય. જો કે કેન્દ્ર અને રાજ્ય સરકાર તથા સ્થાનિક વહીવટી તંત્રએ મહાકુંભને યાત્રાળુઓ માટે સગવડભર્યો બનાવવા માટે કોઈ કસર છોડી નથી.