લોકશાહીને ધર્મ માનતા હો તો એના નિયમ પાળો...

સંસદનું વધુ એક સત્ર ઝાઝાં કામકાજ વગર પૂરું થઈ ગયું. ગૌણ મુદ્દે લડાઈ-ઝઘડા વહોરીને, એમાં સમય વેડફીને સાંસદો મહત્ત્વના પ્રશ્નો વિશે ચર્ચા કરવાનું ટાળે છે. એટલું જ નહીં, પ્રજાના પ્રતિનિધિ તરીકે સંસદભવનમાં એમના અવાજને વાચા આપવાની ફરજ પણ ચૂકી જાય છે. આમાં પછી જન સામાન્યને રાજકારણીઓ પર ભરોસો કેમ બેસે?

- હીરેન મહેતા

જમાનો આગળ વધી રહ્યો છે. વિજ્ઞાન અને જ શાનના નિતનવી શોધ સરેરાશ માણસનું જીવનસ્તર સુધારી રહી છે. વધુ ને વધુ લોકો કમ સે કમ અક્ષરજ્ઞાન મેળવી રહ્યા છે. જો કે આ સામે સમાજમાં અમુક બદી પણ વધી રહી છે. નીતિમૂલ્યો બદલાઈ રહ્યાં છે અને લોકો એટલી સહજતાથી એ સ્વીકારી અને અપનાવી રહ્યા છે. એક સમયે જે કરવામાં મોટા ભાગના લોકો અચકાતાં, એમને સમાજનો છોછ કે ડર રહેતો એવું હવે બહુ રહ્યું નથી. ખોટું કરવાનો સંકોચ હવે અગાઉના પ્રમાણમાં ઘણા ઓછા લોકોને નડે છે. આને એક પ્રકારનું નૈતિક અધઃપતન કહીએ તો એમ, પણ લોકોને મન મૂલ્યો-સિદ્ધાંતોનું ઝાઝું મહત્ત્વ રહ્યું નથી, એનું પ્રમુખ કારણ એ છે કે આપણી આસપાસ, સમાજમાં ઠેર ઠેર એવું જ બધું ચાલી રહ્યું છે. એક જણ નિર્વસ્ત્ર થાય એટલે એને અનુસરવા માગતા બીજા માણસને શરમનો આંચળો ફગાવવાનું ઉદાહરણ મળી જાય છે.