કંઈ કરવાની જરૂરત નહોતી, પણ એને તો ઝંખના હતી સ્વઓળખ મેળવવાની

એનો જન્મ જાહોજલાલી વચ્ચે થયો. ધનાઢ્ય પિતાની એકમાત્ર દીકરી તરીકે ઉછેર પણ ભારે લાડકોડભર્યો અને પછી સાધનસંપન્ન પરિવારમાં લગ્ન. સુખસાગરથી છલોછલ આ નારીને તેમ છતાં કંઈક અધૂરપ લાગતી, હજી કંઈક ખાલીપો છે એવું લાગતું. એ ખાલી જગ્યા હતી સ્વઓળખ માટેની, જેને મેળવવા માટેની જાત સાથેની જ લડાઈ અનેક મહિલાને પ્રેરણા આપે છે.

- અરવિંદ ગોંડલિયા

એના પિતા અનુભાઈ તેજાણી સુરતના ડાયમંડ બિઝનેસનું જાણીતું નામ. પતિ જગદીશ ઈટાલિયા શિક્ષણ, કળા અને સેવાકીય પ્રવૃત્તિ સાથે જોડાયેલું પ્રતિષ્ઠિત નામ. આ બન્નેની ઘટાટોપ છાયા વચ્ચે તેજસ્વી કિરણ જેવી ઓળખ બનાવવી એ એક કપરું કામ હતું.

એની પાસે દુનિયાનું બધું સુખ હતું. નહોતી તો એની પોતાની આગવી ઓળખ. જો કે ધીરજ, મહેનત અને ખંતથી એણે એ ઓળખ પ્રાપ્ત કરી, એ પણ ઘર અને કરિયર વચ્ચે અદ્ભુત બૅલેન્સ રાખીને. આજે એને લોકો પિતા કે પતિના નામે નહીં, પણ એણે પોતે ઊભી કરેલી ઓળખથી પિછાણે છે. એનું નામ છેઃ અજિતા ઈટાલિયા.

સિન્સિયર્લી યૉર્સ... આ શબ્દ મને બહુ ગમે છે. સ્ત્રી એની સાથે જોડાયેલી પ્રત્યેક વ્યક્તિ માટે એની બનીને આખી જિંદગી જીવી જતી હોય છે. આવું કરતાં ક્યારેક એને કંટાળો આવે, રડવું પણ આવે. હું શા માટે આ બધું વેંઢારું છું? એવો સવાલ પણ થાય, છતાં એ બધા સવાલની વચ્ચે એ સિન્સિયર્લી યૉર્સ કહેતાં કહેતાં આંખોની ભીનાશ વચ્ચે સપનાં સાચવીને જીવતી રહે છે... અજિતા ઈટાલિયા પોતાની ડાયરી (સિન્સિયર્લી યૉર્સ)ની પૂર્વભૂમિકામાં આ શબ્દો લખીને ઉમેરે છેઃ આમ તો આ એક અંગત ડાયરી છે, પણ એ દરેક સ્ત્રીની ડાયરી હોઈ શકે છે.

આજે આ અજિતા ઈટાલિયા પ્રિયદર્શિની સમક્ષ એની જિંદગીની ડાયરીનાં પાનાં ખોલે છે...

ડાયમંડ બિઝનેસમૅન અનુભાઈ તેજાણી અને મંજુલાબહેન તેજાણીનું એકમાત્ર સંતાન એટલે અજિતા. અજિતાનો જન્મ એના મામાને ઘરે સૌરાષ્ટ્રના ગારિયાધારમાં. નર્સરીનો અભ્યાસ ડાયમંડ નગરીમાં અને પછી પરિવાર મુંબઈ શિફ્ટ થયો એટલે છ ધોરણ સુધીનું શિક્ષણ માયાનગરી મુંબઈમાં. જો કે કામકાજને કારણે પરિવાર ફરી સુરત આવી ગયો એટલે બારમા ધોરણ સુધીનું શિક્ષણ સુરતની લુડ્સ કૉન્વેન્ટ સ્કૂલમાં.