ఎపిటోమ్ కాదిది..భూములను మింగే ఆక్టోపస్..

• ప్రభుత్వ స్థలాన్ని కబలించిన రియల్ మాఫియా • కొండలను కొల్లగొడుతూ కోట్లు గడిస్తున్న వైనం

• ప్రభుత్వ స్థలాన్ని కబలించిన రియల్ మాఫియా

• కొండలను కొల్లగొడుతూ కోట్లు గడిస్తున్న వైనం

• చౌటుప్పల్ మండలం, దేవులమ్మ నాగారం కార్యదర్శి వింత పోకడ...

• హెచ్ఎండిఏ మ్యాన్యువల్ అనుమతులకు గ్రామ కార్యదర్శి కార్యాలయ ముద్ర వేసి గ్రీన్ సిగ్నల్

• తాత్కాలిక అనుమతులు జారీ చేసి పంచాయతీరాజ్ చట్టానికి తూట్లు...

• ప్రభుత్వ, వక్స్ బోర్డు భూమితో పాటు స్మశాన వాటిక స్థలాన్ని వదలని దౌర్భాగ్యం..

• స్థానిక ప్రజాప్రతినిధులు, అధికారుల అండతోనే అక్రమ వెంచర్.. ఏపీటోమ్ సంస్థకి జీ స్క్వేర్ పేరుతో భారీ ప్రచారం..

• నాలా కన్వర్షన్ లేకుండానే ఏపీటోమికి అనుమతి ఎలా సాధ్యం..?

• పంచాయితీ రాజ్ చట్టం 2018లోని సెక్షన్ 268 ప్రకారం చర్యలు తీసుకోవాలి..

'యధా రాజా తథా ప్రజా' అని పెద్దలు చెబుతుంటారు.. అంటే రాజ్యాన్ని పాలించే రాజు నడవడికను బట్టి ఆ రాజ్య ప్రజల యొక్క నడవడిక ఉంటుంది.. అదే పరిస్థితి ప్రస్తుతం మన రాష్ట్రంలో నెలకొని ఉంది.. ప్రభుత్వ పెద్దల తీరు అభ్యంతకరంగా ఉండటంతో.. ప్రభుత్వంలో భాగస్వామ్యమైన అధికారులు, ఉద్యోగులు కూడా గతితప్పి విధులు నిర్వహిస్తున్నారు.. రాష్ట్రంలో జరుగుతున్న అనేక భూకంభకోణాల్లో ప్రజా ప్రతినిధులు, వారి కుటుంబ సభ్యుల పాత్ర సుస్పష్టంగా కనిపిస్తోంది.. ఇలాంటి ప్రభుత్వంలో ప్రభుత్వ ఆస్తులకు రక్షణ ఉంటుందనే నమ్మకాన్ని ప్రజలు కోల్పోయారు.. ప్రస్తుతం రాష్ట్రంలో కొనసాగుతున్న పరిస్థితుల్లో ప్రజలే వారి ఆస్తులను కాపాడుకోవాల్సిన దుస్థితి ఏర్పడింది. అందుకోసం వారు నడుం బిగించాల్సిన సమయం ఆసన్నమైంది... ఎపిటోమ్ సంస్థ కబంధహస్తాల్లో కనుమరుగవుతున్న కోట్ల రూపాయల ప్రభుత్వ సంపదను కాపాడే నాథుడు కరువయ్యాడు. ప్రభుత్వ ఆస్తులను కాపాడుతూ ప్రజలకు సేవ చేస్తానని ప్రమాణం చేసి గద్దెనెక్కిన ప్రజాప్రతినిధులు పైసల కోసం పక్కదారి పడుతుండడం, ప్రభుత్వ ఆశయాన్ని అమలు చేయాల్సిన అధికారులు సైతం వారికి వంత పాడడం ఎపిటోమ్ లో జరుగుతున్న అక్రమాలకు సాక్షీభూతంగా కనిపిస్తోంది..