తెలంగాణకు కొత్త రైల్వే ప్రాజెక్టులు

• దశాబ్దాల కల నెరవేరబోతోంది.. • వాణిజ్యపరంగా, రవాణా సౌకర్యాల అభివృద్ధి..

• దశాబ్దాల కల నెరవేరబోతోంది..

• వాణిజ్యపరంగా, రవాణా సౌకర్యాల అభివృద్ధి..

• రాష్ట్రం సహకరించకపోయినా కేంద్రం ముందుకొచ్చింది..

• పలు ప్రాంతాలకు రైలు అనుసంధానం చేసే ప్రాజెక్టులు..

• తెలంగాణ అభివృద్దే కేంద్రం ధ్యేయం : కిషన్ రెడ్డి..

హైదరాబాద్, 03 సెప్టెంబర్ (ఆదాబ్ హైదరాబాద్) దశాబ్దాలుగా ఉమ్మడి ఆదిలాబాద్, నిజామాబాద్ జిల్లా ల ప్రజల ఆకాంక్షలు నెరవేరనున్నాయి.. ఆదిలాబాద్,ఇచ్చోడ,నేరడిగొండ, నిర్మల్, బాల్కొండ, ఆర్మూర్, బోధన్, బాన్సువాడ, నిజాంపేట్, సంగారెడ్డి మీదుగా పటాన్చెరు వరకు ఈ రైలు మార్గం ఉంటుంది.ఉత్తర తెలంగాణను ఇటు హైదరాబాద్ నూ, ముంబై తోనూ, అటు నాగ్పూర్ మీదుగా దేశరాజధాని ఢిల్లీతో ఈ మార్గం అనుసంధానం చేస్తుంది. ఇది ఈ రెండు పాత జిల్లాల చిరకాల కోరిక. ఉత్తర తెలంగాణలో లైఫ్ లైన్ గా ఈ ప్రాజెక్ట్ మారుతుందని చెప్పొచ్చు. ఈ ప్రాజెక్టు ద్వారా ఈ ప్రాంతంలో ఆర్థికాభివృద్ధితోపాటుగా వ్యవసాయ ఉత్పత్తులను రైతులు మార్కెట్కు తరలించేందుకు వీలవుతుంది.ఈ ప్రాజెక్టు మొత్తం పొడవు: 317 కి.మీ. అంచనా వ్యయం సుమారు రూ.5,706 కోట్లు. రెండో మెగా ప్రాజెక్టు దక్షిణ తెలంగాణ ప్రాంతాన్ని అనుసంధానం చేస్తుంది. పాత వరంగల్ జిల్లా, ప్రస్తుత మహబూబాబాద్ జిల్లా డోర్నకల్ నుంచి.. కూసుమంచి, పాలేరు, మోతే, సూర్యాపేట, నల్గొండ, కల్వకుర్తి, నాగర్ కర్నూల్, వనపర్తి మీదుగా గద్వాల్కు ఈ ప్రాజెక్టు అనుసంధానం అవుతుంది.ఉమ్మడి ఖమ్మం, నల్గొండ, మహబూబ్ నగర్ జిల్లాల్లోని ముఖ్యమైన ప్రాంతాలన్నీ ఈ కొత్త రైల్వే లైను ప్రాజెక్టు ద్వారా అనుసంధానం అవుతాయి. రైతుల మేలు కోసం కాటన్ ఎగుమతికి, బియ్యం రవాణాకు, గ్రానైట్ తరలింపునకు.. ఈ లైన్ ఎంతగానో ఉపయోగపడుతుంది. సింగరేణి కాలరీస్ నుంచి కర్ణాటక, మహారాష్ట్ర ప్రాంతాలను కలపడం ద్వారా వాణిజ్య అవసరాలకు కూడా ఈ రైల్వే లైన్ చాలా బాగా ఉపయోగ పడుతుంది. ఈ ప్రాజెక్టు మొత్తం పొడవు: 296 కి.మీ, అంచనా వ్యయం సుమారు: రూ. 5,330 కోట్లు.