திருச்சுழி அருகே அதிமுகவினரிடையே மோதல்: துப்பாக்கியால் சுட்டு மிரட்டியவரிடம் போலீஸ் விசாரணை

விருதுநகர் மாவட்டம், கல்விமடை அருகே அதிமுகவினரிடையே வெள்ளிக்கிழமை மோதல் ஏற்பட்டது. அப்போது, கைத்துப்பாக்கியைப் பயன்படுத்திய அதிமுக தகவல் தொழில்நுட்ப அணி நிர்வாகியிடம் போலீஸார் விசாரணை நடத்தினர்.

விருதுநகர் மேற்கு மாவட்ட அதிமுக செயலராக இருப்பவர் முன்னாள் அமைச்சர் கே.டி. ராஜேந்திர பாலாஜி. கிழக்கு மாவட்ட அதிமுக செயலராக இருப்பவர் ரவிச்சந்திரன். இவர்கள் இருவரும் இருவேறு அணிகளாகச் செயல்படுவதாகக் கூறப்படுகிறது. இதனிடையே, கே.டி. ராஜேந்திர பாலாஜியின் ஆதரவாளராக இருந்த சாத்தூர் முன்னாள் சட்டப்பேரவை உறுப்பினர் ராஜவர்மன், ரவிச்சந்திரன் அணிக்கு மாறினாராம். கே.டி. ராஜேந்திரபாலாஜியின் ஆதரவாளரான நரிக்குடி மேற்கு அதிமுக ஒன்றியச் செயலர் நாலூர் பூமிநாதன் அண்மையில் இந்தப் பொறுப்பில் இருந்து நீக்கப்பட்டார். இவருக்குப் பதிலாக தச்சனேந்தல் சந்திரன் நரிக்குடி மேற்கு ஒன்றியச் செயலராக நியமிக்கப்பட்டார். இதனால், பூமிநாதன் தரப்பினருக்கும், சந்திரன் தரப்பினருக்குமிடையே கருத்து வேறுபாடு நிலவுகிறது.