નરોડા ગામ હત્યાકાંડ ચુકાદાના પગલે કોર્ટ સંકુલ પોલીસ છાવણીમાં ફેરવાયું

આઇકાર્ડ વગર કોર્ટમાં કોઈને પણ પ્રવેશ પર પ્રતિબંધઃ માયા કોડનાની સહિતના આરોપીઓ કોર્ટમાં હાજર

અમદાવાદ, ગુરુવાર

વર્ષ ૨૦૦૨માં સર્જાયેલા નરોડા ગામ હત્યાકાંડમાં સ્પેશિયલ એસ.કે. બક્ષી કોર્ટના જજ આજે ચુકાદો આપશે. નરોડા ગામ હત્યાકાંડમાં પૂર્વ ધારાસભ્ય માયાબહેન કોડનાની, વીએચપીના અગ્રણી જયદીપ પટેલ, બાબુ બજરંગી સહિત ૬૯ આરોપી વિરુદ્ધ ગુનો દાખલ થયો હતો. કેસમાં સંડોવાયેલા તમામ આરોપી કોર્ટમાં હાજર થઇ ગયા છે ત્યારે સાક્ષી તેમજ તમામ પક્ષના વકીલો પણ હાજર છે. ચુકાદાના પગલે સેશન્સ કોર્ટ પોલીસ છાવણીમાં ફેરવાઈ છે કોર્ટમાં આઇકાર્ડ વગર કોઇને પણ અંદર પ્રવેશ આપવામાં આવી રહ્યો નથી.

૨૭ ફેબ્રુઆરી ૨૦૦૨ના રોજ ગુજરાતના ગોધરા ખાતે સાબરમતી એક્સપ્રેસમાં અયોધ્યાથી પરત ફરી રહેલા કાર સેવકોના ડબામાં પેટ્રોલ નાખીને તેમને જીવતા સળગાવી નાખવામાં આવ્યા હતા. તેના પ્રત્યાઘાતરૂપે ૨૮ ફેબ્રુઆરી ૨૦૦૨ના રોજ ગુજરાતમાં બંધનું એલાન આપવામાં આવ્યું હતું. આ દરમિયાન અમદાવાદ શહેર સહિત સમગ્ર ગુજરાતમાં કોમી તોફાનો ફાટી નીકળ્યાં હતાં. આ તોફાનોમાં ૨૮ ફેબ્રુઆરીના રોજ નરોડા ગામમાં ૧૧ લોકોને ઘરમાં અને બહાર જીવતા સળગાવી નાખવામાં આવ્યા હતા.