બાકી પ્રોપર્ટી ટેક્સ મામલે તંત્ર દ્વારા દક્ષિણ ઝોનમાં ૧૫ કોમર્શિયલ મિલકતોની જાહેર હરાજીનાં ચક્રો ગતિમાન

આ મિલકતોનો કુલ રૂ. ૨.૮૭ કરોડનો બાકી ટેક્સ તંત્રના ચોપડે બોલે છે

અમદાવાદ, મંગળવાર

મ્યુનિસિપલ કોર્પોરેશનના પ્રોપર્ટી ટેક્સ વિભાગે કમિશનર થેન્નારસનના આદેશના પગલે ડિફોલ્ટર્સ સામે કડક સીલિંગ ઝુંબેશ હાથ ધરી હતી. નાણાકીય વર્ષ ૨૦૨૨-૨૩માં ન ભૂતો ન ભવિષ્યતિની જેમ એક લાખથી વધુ કોમર્શિયલ એકમને તંત્રનાં તાળાં લાગ્યાં હતાં. બીજી તરફ સત્તાવાળાઓએ મોટી રકમના ડિફોલ્ટર સામે તેમની મિલકતની જાહેર હરાજીની દિશામાં પણ ચક્રો ગતિમાન કર્યાં હતાં, જે હેઠળ ૧૫૦થી વધુ મિલકતોને તે નાણાકીય વર્ષમાં જાહેર નોટિસ અપાઈ હતી. હવે જ્યારે નવું નાણાકીય વર્ષ ૨૦૨૩-૨૪નો પ્રારંભ થયો છે તો ફરીથી તંત્ર આકરાં પાણીએ આવ્યું છે અને અત્યાર સુધીના ઇતિહાસમાં પહેલી વખત નવા નાણાકીય વર્ષની શરૂઆતમાં જ મોટી રકમના ડિફોલ્ટર્સની મિલકતની જાહેર હરાજી કરવાની દિશામાં પ્રોપર્ટી ટેક્સ વિભાગ મક્કમ બન્યો છે, જેના કારણે ડિફોલ્ટર્સમાં ભય વ્યાપી ગયો છે.