અમદાવાદમાં અષાઢી માહોલ

અંજાર, માંડવી, ભચાઉ અને ભૂજમાં આઠથી નવ ઈચ વરસાદ ખાબકતાં જળબંબાકાર: બનાસકાંઠા, સાબરકાંઠા, ખેડા, મહેસાણામાં સવારે બે કલાકમાં દોઢ ઈંચ વરસાદ

અમદાવાદ, શનિવાર

વિનાશક બિપરજોય વાવાઝોડાની અસરથી શહેરમાં અષાઢી માહોલ છવાયો છે. આકાશમાં છવાયેલાં વરસાદી પાણીથી છલોછલ એવાં કાળાં-ડિબાંગ વાદળાંથી સૂર્યનારાયણ અલોપ થઈ ગયા છે. આજે વહેલી સવારે ચાંદખેડા, રાણીપ, વેજલપુર, કોતરપુરમાં ભારે વરસાદ તૂટી પડ્યો હતો. જોકે છ વાગ્યા પછી વરસાદનું જોર ઓછું થતાં નોકરી-ધંધાએ જવા નીકળેલા લોકોએ હાશકારો અનુભવ્યો હતો, પરંતુ આજે શહેરમાં ભારે વરસાદની આગાહી હોઈ અમદાવાદીઓએ સાચવવાની જરૂર છે.

ટાગોરહોલ ખાતેના મ્યુનિ. મોન્સૂન કન્ટ્રોલરૂમનાં સૂત્રોના જણાવ્યા મુજબ આજે સવારે છ વાગ્યે પૂરા થયેલા ૨૪ કલાકમાં શહેરમાં વધુ ૨૮.૬૯ મિ.મી. (એક ઈંચ જેટલો) વરસાદ વરસ્યો હતો. પશ્ચિમ ઝોનના રાણીપમાં સૌથી વધુ બે ઈંચ વરસાદ, કોતરપુરમાં પોણા બે ઈંચ વરસાદ નોંધાયો હતો, જ્યારે ગોતામાં સૌથી ઓછો અડધો ઈંચ વરસાદ પડ્યો હતો.