ડિજિટલ એરેસ્ટની જાળ બાદ હવે અમદાવાદ ક્રાઈમ બ્રાંચના નામે લાખો રૂપિયાની છેતરપિંડી

અમે ચોરને પકડ્યો છે, તમે ચોરીના દાગીના ખરીદેલા, મેટરમાંથી નીકળવું હોય તો ઓનલાઈન રૂપિયા આપો' જેવી ધમકીઓનો ત્રાસ ક્રાઈમ બ્રાંચના નામે શાતિર ગઠિયો ૧.૪૦ લાખ રૂપિયા ખંખેરી ગયો

દિલ્હી પોલીસ, સીબીઆઇ,નાર્કોટિક્સ કંટ્રોલ બ્યૂરો (એનસીબી), મુંબઈ પોલીસ સહિત સેન્ટ્રલ એજન્સીઓના નામે ઠગાઇ કરતી ગેંગ સક્રિય થઇ છે. હાલ પોલીસ એજન્સીઓના નામે ગઠિયાઓ નિર્દોષ લોકોને ડિજિટલ એરેસ્ટ કરીને લાખોકરોડો રૂપિયા ખંખેરી રહ્યા છે, જેનો ત્રાસ હાલ સૌથી વધુ ફેલાયો છે.

સાયબર ગઠિયાઓએ ચારેકોર આતંક મચાવ્યો છે ત્યારે ગુજરાતની સૌથી પ્રખ્યાત અને વિવાદિત અમદાવાદ ક્રાઇમ બ્રાંચના નામે ચીટિંગ કરતી ટોળકી સક્રિય થતાં ચકચાર મચી ગઇ છે. અમદાવાદ ક્રાઇમ બ્રાંચના નામે ભૂજના સોના-ચાંદીનો ધંધો કરતા એક વેપારી સાથે ૧.૪૦ લાખ રૂપિયાની ઠગાઇ થઇ છે, જેમાં પોલીસે તપાસનો ધમધમાટ શરૂ કર્યો છે.