ઠંડીમાં ઘટાડો છતાં બરફીલા પવનો ફૂંકાતાં અમદાવાદીઓને કોઈ ખાસ રાહત મળી નહી

સૌરાષ્ટ્ર અને કચ્છમાં કડકડતી ઠંડી યથાવત્

બંગાળની ખાડી તરફથી ફૂંકાઈ રહેલા ભેજવાળા પવનો અને રાજ્ય પર સ્થિર થયેલા નવા વેસ્ટર્ન ડિસ્ટર્બન્સના કારણે કેટલાય વિસ્તારોના વાતાવરણમાં મોટો પલટો જોવા મળ્યો છે અને અનેક સ્થળોએ વાદળછાયું વાતાવરણ ખેડૂતોની ચિંતામાં વધારો કરી રહ્યું છે. અમદાવાદ શહેરમાં આજે સવારે ઠંડીમાં ઘટાડો નોંધાવા છતાં પણ ગઈ રાતથી ફૂંકાઈ રહેલા ઠંડાગાર બરફીલા પવનોના કારણે શહેરીજનોને ઠંડીથી ખાસ રાહત મળી નથી. આજે સવારે અમદાવાદ શહેરમાં ૧૫ ડિગ્રી લઘુતમ તાપમાન નોંધાયું હતું, જે સામાન્ય કરતાં ૨.૧ ડિગ્રી જેટલું ઓછું છે. ઉલ્લેખનીય છે કે ગઈ કાલે અમદાવાદમાં ૧૨.૭ ડિગ્રી ઠંડી નોંધાતાં અમદાવાદીઓની હાલત બગડી હતી. ગઈ કાલે શહેરમાં ૨૬.૭ ડિગ્રી મહત્તમ તાપમાન નોંધાયું હતું અને આખો દિવસ ફૂંકાયેલા પવનોએ લોકોને પરેશાન કર્યા હતા.

સૌરાષ્ટ્ર અને કચ્છમાં ડંખીલા ઠારથી વાતાવરણ સતત ઠંડુંગાર બની રહ્યું છે. કચ્છના નલિયા શહેરમાં આજે ૮.૫ ડિગ્રી, જ્યારે સૌરાષ્ટ્રના રાજકોટમાં ૯.૮ ડિગ્રી સેલ્સિયસ ઠંડી નોંધાતાં લોકો ધ્રૂજી ઊઠ્યા હતા. કચ્છના જિલ્લા મથક ભૂજનું લઘુતમ તાપમાન ૧૧.૪ ડિગ્રીએ યથાવત્ રહેતાં શહેરીજનો ઠંડીના મારથી હેરાન થઈ ગયા છે.