બાપુનગર લૂંટઃ રથયાત્રાના દિવસે જ બાઈક ચોર્યું અને પાંચ કલાક ‘શિકાર’ની રાહ જોઈ

લુટારુ ટોળકી અન્ય શહેરમાંથી આવી હોવાની પોલીસને આશંકાઃ બાઈકની ચોરી કર્યા બાદ બાપુનગરમાં સલામત જગ્યા શોધી સંતાડ્યું

અમદાવાદ, શનિવાર

શહેરના બાપુનગર વિસ્તારમાં થયેલી આંગડિયા પેઢીની ચકચારી લૂંટના કેસમાં પોલીસ એક પછી એક કડીઓ જોડતી જાય છે. લુટારુઓએ રથયાત્રાના દિવસે જ અમદુપુરા પોલીસ ચોકીની બહારથી બાઈકની ચોરી કરી હતી. ત્યારબાદ આ બાઈકને બાપુનગર વિસ્તારમાં કોઈ સલામત સ્થળ શોધી સંતાડવામાં આવ્યું હતું. ઘટનાના દિવસે વડોદરા કે સુરત શહેરમાંથી લુટારુઓ એક્સપ્રેસ-વે મારફતે અમદાવાદમાં આવી પહોંચ્યા હતા, જ્યાં તેઓ રિક્ષામાં બેસીને બાપુનગર આવ્યા હતા. લૂંટ થયાના પાંચ કલાક પહેલાં જ મોરચો સંભાળીને લુટારુઓ ‘શિકાર’ની રાહ જોઈને તૈયાર બેઠા હતા. પોલીસે ૧૦૦થી પણ વધુ સીસીટીવી કેમેરાના ફૂટેજ ચેક કરીને તેના આધારે એક પછી એક કડીઓ જોડવાની શરૂઆત કરી છે. આ ઉપરાંત શહેરના પૂર્વ વિસ્તારમાં આવેલી અનેક હોટલમાં પણ સઘન ચેકિંગ હાથ ધર્યું છે.