ગુજરાતમાં મેઘકહેરઃ રાજકોટ, દ્વારકા, ભાવનગર અને વલસાડને ધમરોળશે

રાજ્યના મુખ્ય ૨૦૭ ડેમમાં ૬૦.૮૩ ટકા જળસંગ્રહ થતાં પાણીનું સંકટ દૂર થયું: હવામાન વિભાગ દ્વારા બે દિવસ માછીમારોને દરિયો ન ખેડવા ચેતવણી

અમદાવાદ, સોમવાર

સમગ્ર રાજ્યમાં વરસાદના ત્રીજા રાઉન્ડ હાહાકાર મચાવ્યો છે. તેમાં પણ ખાસ કરીને સૌરાષ્ટ્ર અને દક્ષિણ ગુજરાતમાં તો મેઘતાંડવ થતાં તારાજીનાં ભારે કરપીણ દૃશ્યો સર્જાયાં છે. લોકો મેઘરાજાને હવે ખમૈયાં કરવાની પ્રાર્થના કરી રહ્યા છે તેમ છતાં ગુજરાતમાં તેનો કહેર ઓછો થવાનો નથી. સ્થાનિક હવામાન વિભાગની ચેતવણી મુજબ હજુ પણ રાજ્યમાં મેઘરાજા ધબધબાટી બોલાવશે. રાજકોટ, દ્વારકા, ભાવનગર અને વલસાડમાં રેડ એલર્ટ જાહેર કરાયું છે, જ્યારે નવસારી, જામનગર, કચ્છ, અમરેલી, સોમનાથ, જૂનાગઢ, ભરૂચ અને વડોદરામાં ઓરેન્જ એલર્ટ જાહેર કરાયું છે.