આજથી લોકસભામાં અવિશ્વાસ પ્રસ્તાવ પર ચર્ચા: પીએમ મોદી ગુરુવારે જવાબ આપશે

આજે વિપક્ષ વતી ચર્ચાની શરૂઆત રાહુલ ગાંધી કરશેઃ શાસક અને વિપક્ષો વચ્ચે જોરદાર જંગ જોવા મળશે

નવી દિલ્હી, મંગળવાર

વડા પ્રધાન નરેન્દ્ર મોદીના નેતૃત્વવાળી કેન્દ્ર સરકાર વિરુદ્ધ લોકસભામાં લાવવામાં આવેલા અવિશ્વાસ પ્રસ્તાવ પર આજથી ઉગ્ર અને આક્રમક ચર્ચા શરૂ થશે. ત્રણ દિવસ સુધી ચાલનારી આ ચર્ચાનો જવાબ પીએમ મોદી ગુરુવારે આપશે. કોંગ્રેસ નેતા રાહુલ ગાંધીનું સાંસદપદ બહાલ થયા બાદ વિપક્ષ તરફથી રાહુલ ગાંધી આજે ૧૨.૦૦ વાગ્યે ચર્ચા શરૂ કરશે અને તેઓ વિવિધ મુદ્દે સરકારને ઘેરવાનો પ્રયાસ કરશે. ચર્ચા દરમિયાન બુધવારે કેન્દ્રીય ગૃહપ્રધાન અમિત શાહ દરમિયાનગીરી કરીને મણિપુર મામલે સવાલોના જવાબ આપશે.