વીઆઈપી બની ૧૩૫૩ લોકોએ અમદાવાદ ઈન્ટરનેશનલ ફ્લાવર શો વટભેર નિહાળ્યો

ત્રણ દિવસમાં ૧.૫૮ લાખ લોકોએ ફ્લાવર શોની મુલાકાત લીધીઃ ગઈ કાલે એક લાખ લોકો આવ્યા

૧૫.૧૦ કરોડ રૂપિયાના ખર્ચે તૈયાર થયેલા ‘અમદાવાદ ઇન્ટરનેશનલ ફ્લાવર શો-૨૦૨૫'ને નિહાળવા માટે અમદાવાદીઓનું કીડીયારું સાબરમતી રિવરફ્રન્ટ પર ઊભરાયું હતું. ગઈ કાલે રવિવાર હોવાથી એક લાખ મુલાકાતીઓ રિવરફ્રન્ટ પર ફ્લાવર શો જોવા માટે આવી પહોંચ્યા હતા. જો ત્રણ દિવસની વાત કરવામાં આવે તો ૧.૫૮ લાખ લોકોએ રિવરફ્રન્ટની મજા માણી હતી. ૩ જાન્યુઆરીથી શરૂ થયેલા ફ્લાવર શોમાં ૧૩૫૩થી વધુ અમદાવાદીઓ એવા છે, જે વીઆઇપી બનીને ગયા હતા. પ્રતિ વ્યક્તિદીઠ ૫૦૦ રૂપિયાની ટિકિટ ખર્ચીને અમદાવાદીઓએ વીઆઈપી રીતે ફ્લાવર શો નિહાળ્યો હતો. વીકએન્ડ હોવાથી ફલાવર શોમાં સહેલાણીઓનું કીડીયારું ઊભરાયું હતું.