மரபுடைமையைக் கட்டிகாக்க உதவித் திட்டம் அவசியம்

சிங்கப்பூரில் இந்தியப் பாரம்பரியத்தின் சிறப்பை எடுத்துரைக்கும் முக்கிய இடங்கள் ஒன்று லிட்டில் இந்தியா.

இந்திய மரபுடைமையைக் கண்முன் நிறுத்தும் பல வணிகங்களை லிட்டில் இந்தியாவில் எங்கும் காணலாம். சில வணிகங்கள் காலத்தின் மாற்றங்களை எதிர்கொண்டபோதும், உறுதியாக நிற்கின்றன.

இந்தியர்களின் பழைய கதைகளைச் சொல்லும் மரபுடைமை வணிகங்களை தொடர்ந்து உயிருடன் வைத்திருக்க தேசிய மரபுடைமைக் கழகம் அண்மையில் ‘சிங்கப்பூர் மரபு தொழில் திட்டம்' என்ற திட்டத்தை அறிமுகப்படுத்தியது.

அந்தத் திட்டம் இப்போதைய சூழலுக்கு அவசியமானது என்று லிட்டில் இந்தியாவின் மரபுடைமை வணிகங்கள் பரவலாகக் கருதுகின்றன.

ஜப்பானியர்களின் ஆட்சிக் காலத்தைப் பார்த்து வளர்ந்த வணிகங்களைச் சிங்கப்பூரில் இப்போது பார்ப்பது கொஞ்சம் அரிது. எஞ்சிய சில வணிகங்களில் இன்னும் இயங்கிக்கொண்டிருப்பது சிராங்கூன் சாலையில் உள்ள சி சுப்பிரமணியம் மளிகைக்கடை.

கிட்டத்தட்ட 80 ஆண்டுகால மரபு கொண்ட இக்கடை சிராங்கூன் சாலைக்கு இடமாறிய பின்னர் ஏறத்தாழ 34 ஆண்டுகளாக செயல்படுகிறது.

அரசாங்கத்தின் அண்மைய அறிவிப்பு நல்ல செய்தி என்றார் சி சுப்பிரமணியம் மளிகைக் கடையின் உரிமையாளர் முரு கேசன் சுப்பிரமணியம், 61.