അമ്പലപ്പുഴയിലെ മറ്റൊരു കുറൂരമ്മ

കേൾക്കുന്നതെല്ലാം വേണുഗാനം.. പറയുന്നതെല്ലാം... ഭഗവാന്റെ നാമം...

- ബാബുരാജ് പൊറത്തിശ്ശേരി,

വർഷത്തിൽ എല്ലാദിവസവും മുടങ്ങാതെ പാൽപ്പായസം നിവേദിക്കുന്ന ഒരു ക്ഷേത്രമുണ്ട് കേരളത്തിൽ. അമ്പലപ്പുഴ കൃഷ്ണന്റെ സന്നിധിയിൽ മാത്രമേ ആ മധുരം നുകരാൻ സാധിക്കുകയുള്ളൂ. പാൽപ്പായസം എന്നു കേട്ടാൽ ഏതൊരു മലയാളിയു ടേയും മനസ്സിൽ ആദ്യം ഓടിയെത്തുക അമ്പലപ്പുഴ പാൽപ്പായസം തന്നെയായിരിക്കും. സാക്ഷാൽ ഗുരു വായൂരപ്പൻ പോലും ഉച്ചപൂജ കഴിഞ്ഞ് അമ്പലപ്പുഴയിലേയ്ക്ക് പാൽപ്പായസം കുടിക്കാൻ വരുമെന്നാണ് പറയപ്പെടുന്നത്. പാൽപ്പായസം അമ്പലപ്പുഴയിൽ നിവേദ്യമായ കഥ ഞാൻ കുറച്ചു മുമ്പെഴുതി യിരുന്നു. ഈ പാൽപ്പായസത്തിന്റെ പ്രശസ്തി ഇന്ന് ഈരേഴുപതിനാല് ലോകത്തിലും പടർന്നു പിടിച്ചിരിക്കുന്നു. പാൽപ്പായസ കഥ പോലെ പ്രശസ്തമായ അമ്പലപ്പുഴയിലെ മറ്റൊരു കുറൂരമ്മ എന്ന് വിശേഷിപ്പിക്കപ്പെടുന്ന ഒരു വാരസ്യാരുടെ കഥ എഴുതാം വർഷങ്ങൾക്ക് മുന്നേ അമ്പലപ്പുഴ ക്ഷേത്രത്തിന് സമീപം ഒരു വാരസ്യാർ താമസിച്ചിരുന്നു. നിത്യവും രാവിലെ കുളികഴിഞ്ഞ് തുളസിക്കതിർ നുള്ളി ഇടയ്ക്കിടെ ചെമ്പകപ്പൂവും ചേർത്ത് മാലയുണ്ടാക്കി ഭഗവാന് സമർപ്പിക്കുമായിരുന്നു. കൃഷ്ണഭക്തയായ ആ അമ്മയോട് എല്ലാവർക്കും വലിയ സ്നേഹവും ആയിരുന്നു. വാരസ്യാർ കൊണ്ടുവരുന്ന മാലയ്ക്കായി വലിയ തിരുമേനി പോലും ചില ദിവസം കാത്തുനിൽക്കുമായിരുന്നു. ഭഗവാനും ഏറ്റവും പ്രിയം വാരസ്യാർ കോർക്കുന്ന മാലയാണെന്നുവരെ പലരും വിശ്വസിച്ചിരുന്നു. അതുകൊണ്ട് പലരും അവർക്ക് പണം നൽകാനും മടിച്ചിരുന്നില്ല.