നിലവിളക്കും നിറപറയും

ഒരു ക്ഷേത്രം നിർമ്മിക്കുകയോ, വീട് പണിയുകയോ ചെയ്യുമ്പോൾ ആദ്യചടങ്ങായ തറക്കല്ലിടുന്നതിനും പിന്നീട് കട്ടിള വയ്പ്പിനും ഗൃഹപ്രവേശനത്തിനും നിലവിളക്ക് കൊളുത്തിയാണ് ചടങ്ങുകൾക്ക് ആരംഭം കുറിക്കുന്നത്. അഷ്ടമംഗല്യ പ്രശ്നത്തിൽ ദീപലക്ഷണം ഒരു പ്രധാന വിഷയമാണ് 

- ബാബുരാജ് പൊറത്തിശ്ശേരി, 9846025010

ഗൃഹത്തിൽ രാവിലെയും സന്ധ്യയ്ക്കും നിലവിളക്ക് കത്തിക്കുന്നത് ഐശ്വര്യപ്രദമാണ്. കൊടിവിളക്ക് ഉപയോഗിച്ചാണ് വിളക്ക് കത്തിക്കേണ്ടത്. പൂജാ മുറിയിലോ മുൻവശത്തെ മുറിയിലോ ഹാളിലോ ആകാം വിളക്ക് വയ്ക്കേണ്ടത്. നിലവിളക്ക് വെറും തറയിൽ വയ്ക്കരുത് എന്ന് പണ്ടുകാലത്തുള്ളവർ പറയാറുണ്ട്. നിലവിളക്ക് വയ്ക്കുമ്പോൾ ഒരു താലത്താലോ, ഇലയിലോ വയ്ക്കണം. അല്ലെങ്കിൽ പീഠമെന്ന് സങ്കൽപ്പിച്ച് കുറച്ച് പുഷ്പങ്ങൾ പ്രാർത്ഥനയോടെ സമർപ്പിച്ച് അതിന് മുകളിൽ നിലവിളക്ക് വയ്ക്കണം. കാരണം, ശാസ്ത്രമനുസരിച്ച് ശംഖ്, പൂജാഗ്രന്ഥം, വിളക്ക് എന്നിവയുടെ ഭാരം ഭൂമിദേവി സ്വയം താങ്ങുകയില്ല. അതുകൊണ്ട് വെറും നിലത്ത് ഇവ വയ്ക്കാറില്ല. നിറയെ എള്ളെണ്ണ ഒഴിച്ച് രണ്ടോ, അഞ്ചോ തിരികളിട്ടാണ് ദീപം തെളിയിക്കേണ്ടത്.

ഏതൊരു ചടങ്ങിനും ദീപം കത്തിച്ച ശേഷമെ നിറയും പറയും നിറയ്ക്കുവാൻ പാടുള്ളൂ എന്നുണ്ട്. നിറ എന്നാൽ ഇടങ്ങഴി. പറ എന്നാൽ പത്ത് ഇടങ്ങഴി കൊള്ളുന്നത് എന്നാണ്. അതിൽ നിറ മുറത്തിലും പറ കൊട്ടയിലും നെല്ല് കൊണ്ട് വന്നുനിറയ്ക്കണം. നിറയും പറയും നിറക്കുമ്പോൾ ആദ്യം മൂന്നുപിടി വാരി ഇടണം. അത് മാതാ-പിതാഗുരു എന്നിവർക്കും അതിനുശേഷം ദൈവങ്ങൾക്കും ചൊരിയണം എന്നാണ് ആചാരം.