திருக்காமக்கோட்டத்து ஆளுடைய நாச்சியார்!

விடிவெள்ளி வானத்தின் கீழ்த்திசையில் பிரகாசமாக உதித்தது.

- அடிகளார் மு.அருளானந்தம்

பயணக்குழுவில் வந்துசேர்ந்த பயணியர்களின் விவரங்களை கண்காணியர்கள் ஒளிவாய்ந்து அப்படைத்தனர். சந்தையூரிலிருந்து புதிதாக வந்து சேர்ந்தவர்களை பயணத்தின்போது ஔவைக்கு அருகாமையில் வரவியலாதவாறும், மிகுந்த கண்காணிப்புடன் பயணக்குழுவின் இறுதிவரிசையில் வரும்படியும், கண்காணியர்கள் வகைப்படுத்தியிருந்தனர்.

இதேவேளையில், பயம்பியர்களின் யானைப் படைகளும் பாண்டிய நாட்டுத் தலைநகரை நோக்கி பயணத்திற்குத் தயாராயினர். பெரிய பெரிய மரச்சக்கரங்கள் பூட்டப்பட்ட மிகப்பெரிய வண்டிகள், யானைகளுக்கும் வீரர்களுக்கும் சமைத்து, கவளங்களாகக் கொடுப்பதற்குத் தேவையான உணவு தானியங்கள் நிரப்பப்பட்டு, நான்கு நான்கு யானைகள் பூட்டப்பட்டு முதல் வரிசையில் நிறுத்தப்பட்டிருந்தன. அவற்றையடுத்து, வீரர்களுக்குத் தேவையான போர்க்கருவிகளும், பாசறைகளுக்குத் தேவையான கூடாரத் துணிகளும், சமையல் பாத்திரங்களும் நிரப்பப்பட்ட வண்டிகள் வரிசையாக யானைகள் பூட்டப்பட்ட நிலையில் நிறுத்தப்பட்டிருந்தன.