പണിതീരാത്ത മരക്കൊട്ടാരത്തിൽ...

മരംകൊണ്ടുള്ള ശില്പങ്ങളും കൊത്തുപണികളും...യക്ഷിക്കഥയിലെ കൊട്ടാരംപോലെ മനോഹരമാണ് തായ്ലാൻഡ് ഉൾക്കടലിന്റെ തീരത്തെ സാങ്ച്വറി ഓഫ് ട്രൂത്ത് ക്ഷേത്രസമുച്ചയം

- TEXT & PHOTOS BYJU P ZEN

വെണ്ണക്കല്ലിൽ കൊത്തിയെടുത്ത, ഇന്ത്യയിലെ താജ്മഹലിനോട് കിട പിടിക്കുന്ന ഭംഗിയുണ്ട് തായ്ലാൻഡിലെ സാങ്ച്വറി ഓഫ് ട്രൂത്ത് ശില്പ ക്ഷേത്രസമുച്ചയത്തിന്. പട്ടായ സിറ്റിയിൽനിന്ന് എട്ടു കിലോമീറ്റർ വടക്ക് തായ്ലാൻഡ് ഉൾക്കടൽ തീരത്തുള്ള ഈ കലാക്ഷേത്ര മ്യൂസിയം പക്ഷേ, പൂർണമായും മരംകൊണ്ടാണ് നിർമിച്ചിട്ടുള്ളത്.

ഇരുപതാം നൂറ്റാണ്ടിലെ ഇന്തോചൈനീസ് തായ് ശില്പകലാ ചാതുര്യത്തിന്റെ പ്രൗഢിയാണ് ഈ ക്ഷേത്രസമുച്ചയം വിളംബരം ചെയ്യുന്നത്. 2115 സ്ക്വയർ മീറ്റർ വിസ്തൃതിയിൽ 40 മീറ്റർ ഉയരമുള്ള ഇതിന്റെ നിർമാണം 1981-ലാണ് തുടങ്ങിയത്. ഇപ്പോഴും പണി നടന്നു കൊണ്ടിരിക്കുന്നു. 2025-ൽ പൂർത്തിയാക്കാനാണ് പ്ലാൻ.

രാവിലെ എട്ടുമുതൽ വൈകീട്ട് ആറുവരെയാണ് സാങ്ച്വറി ഓഫ് ട്രൂത്തിലേക്കുള്ള പ്രവേശനം. മുതിർന്നവർക്ക് 500 തായ് ബാത്തും (1200 രൂപ) കുട്ടികൾക്ക് 250 ബാത്തുമാണ് പ്രവേശന ഫീസ്, ടിക്കറ്റ് കൗണ്ടർ കടന്ന് മണൽ നിറഞ്ഞ വഴിയിലൂടെ നടന്നാൽ ദൂരെ കടൽ തീരത്തെ ശില്പകൊട്ടാരം കാണാം. കൈകാലുകൾ മറച്ചുള്ള വസ്ത്രം ധരിക്കുന്നവർക്കു മാത്രമേ ക്ഷേത്രത്തിൽ പ്രവേശനം അനുവദിക്കൂ.