ஆரோக்கியத்தை அள்ளித்தரும் சிறுதானிய உணவுகள்...!

இம்மாதம் 21-ஆம் தேதி பனிப்பாறைகள் தினமாகும்.

பனிப் பாறைகள் வெகு வேகமாக உருகுகின்றன, அருகுகின்றன என்பதை புள்ளிவிவரம் புலப்படுத்திவருகிறது.

இதே நிலை தொடர்ந்து நீடித்தால் எதிர்காலத்தில் பல ஜீவ நதிகள் வறண்டுவிடும் என்பதைப் புறந்தள்ளிவிட முடியாது. இ துபோன்ற பருவ நிலை மாற்றம் காரணமாக எதிர் காலத்தில் தண்ணீர் தட்டுப்பாடு ஏற்பட வாய்ப்புள்ளது என்று அறிவியல் வல்லுநர்கள் தொடர்ந்து எச்சரிக்கை மணி அடித்து வருகின்றனர்.

நெல்லும் கோதுமையும் அதிக அளவில் தண்ணீரை உறிஞ்சக் கூடிய பயிர்களாகும். நீர் வளம் குன்றினால் நெல் மற்றும் கோதுமை விளைச்சல் குறைந்து விடும். பஞ்சாபில் ஏறத்தாழ இத்தகைய நிலை மேலோங்கத் தொடங்கிவிட்டது.

உலக மக்களில் 90 சதவீதத்துக்கும் மேற்பட்டோர் அரிசி, கோதுமை, பார்லி உள்ளிட்டவற்றையே பிரதான உணவாகப் பயன்படுத்துகிறார்கள். கோதுமையில் எல்லா சத்துக்களும் நீக்கப்பட்ட பிறகு எஞ்சியுள்ள சக்ககைதான் மைதா மாவாகும். துரதிர்ஷ்ட வசமாக மைதா மாவின் பயன்பாடு அதிகரித்துக் கொண்டே இருக்கிறது. இதற்கும் பல்வேறு நோய்கள் உக்கிரமடைவதற்கும் தொடர்பு உண்டு என்பதை மருத்துவ வல்லுநர்கள் பலர் சுட்டிக்காட்டியுள்ளனர்.

எனவே தண்ணீர் பற்றாக்குறை என்ற அடிப்படையில் ஆனாலும் சரி அல்லது ஆரோக்கிய மேம்பாடு என்ற அடிப்படையில் ஆனாலும் சரி சிறு தானியங்கள் முதன்மை பெறுவது உறுதியாகிவிட்டது.