മാനുഷികതയുടെ മറുവാക്ക്

വഴിത്തിരിവ് എറിക് നോബർട്ട്

- ഉമ ആനന്ദ്

വാഹനാപകടങ്ങളും തുടർന്നുള്ള മരണങ്ങളും കേരളത്തിൽ നിത്യസംഭവമാണ്. എന്നാൽ അപകടം സംഭവിച്ചു കഴിഞ്ഞാൽ നോക്കി നിൽക്കാനും ഫോട്ടൊയെടുക്കാനുമല്ലാതെ പരിക്കേറ്റ ആളെ രക്ഷിക്കാൻ ആരും തയ്യാറാവാത്ത സാഹചര്യമാണ് ഇപ്പോഴുമുള്ളത്. ഇവിടെയാണ് വിധിയെ തോൽപ്പിച്ച് പരിക്കേറ്റയാൾക്ക് പുനർജൻമം നൽകുന്ന എറിക് നോബർട്ടി'ന്റെ കഥ വേറിട്ട് നിൽക്കുന്നതും പ്രകാശം പരത്തുന്നതും.

ആദ്യത്തെ ജീപ്പ് യാത്ര തന്നെ പരിക്കേറ്റയാളെ ആശുപത്രിയിലാക്കിക്കൊണ്ടായിരുന്നു. അതൊരു വഴിത്തിരിവായി. ഇപ്പോഴും പ്രതിഫലേച്ഛ കൂടാതെ പരിക്കേറ്റവരെ ആശുപത്രിയിലെത്തിക്കുന്ന എറിക് നോബർട്ട് വേറിട്ട വഴിയിൽ എത്തിപ്പെട്ടതിന്റെ കഥ പറയുന്നു

“തികച്ചും യാദൃച്ഛികമായാണ് എന്റെ പതിനെട്ടാം വയസ്സിൽ അപകടത്തിൽപ്പെട്ട ഒരു വ്യക്തിയെ ആശുപത്രിയിലെത്തിക്കുന്നതും അദ്ദേഹം ജീവിതത്തിലേക്ക് തിരികെ വരുന്നതും. ആ ഓർമ്മ മനസ്സിൽനിന്ന് മായാതെ പറ്റിച്ചേർന്ന് നിൽക്കുന്നതു കൊണ്ടു തന്നെയാണ് ഇപ്പോഴും ആ പാത പിൻതുടരുന്നത്.

കോട്ടുവള്ളിയിലായിരുന്നു എന്റെ ജനനം. അച്ഛൻ നോബർട്ട് സേവ്യറിന് എഫ്.എ.സി.ടി.യിലായിരുന്നു ജോലി. അമ്മ ഉഷ നോബർട്ട്. മൂന്നാൺമക്കളിൽ രണ്ടാമനായിരുന്നു ഞാൻ. സ്കൂൾ കോളജ് വിദ്യാഭ്യാസം കൂനമ്മാവിലും ആലുവയിലുമായിരുന്നു.