മുത്തുലക്ഷ്മി റെഡ്ഡി

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

ബ്രിട്ടീഷ് ഇന്ത്യയിലെ ആദ്യത്തെ വനിതാ നിയമസഭാ സാമാജികയാണ് സാമൂഹ്യ പരിഷ്കർത്താവും മെഡിക്കൽ പ്രാക്ടീഷണറുമൊക്കെ ആയിരുന്ന മുത്തുലക്ഷ്മി റെഡി. അവർ പല കാര്യങ്ങളിൽ ഒന്നാമതായിരുന്നു. ആണുങ്ങൾക്കുള്ള കോളജിൽ അഡ്മിഷൻ ചെയ്യപ്പെട്ട ആദ്യ പെണ്ണ്, സർക്കാർ വക ആശുപത്രിയിൽ നിയോഗിക്കപ്പെട്ട ആദ്യ വനിതാ സർജ്ജൻ, സ്റ്റേറ്റ് സോഷ്യൽ വെൽഫയർ അഡ്വൈസറി ബോർഡിന്റെ അദ്യത്തെ ചെയർ പേഴ്സൺ തുടങ്ങി നിരവധി കാര്യങ്ങൾ പറയാം.

1886-ൽ തമിഴ്നാട്ടിലെ പുതുക്കോട്ടയിലാണ് മുത്തുലക്ഷ്മിയുടെ ജനനം. ചന്ദ്രമയി എന്ന ദേവദാസി സ്ത്രീയെ വിവാഹം കഴിച്ചതിന്റെ പേരിൽ അവളുടെ അച്ഛൻ കുടുംബത്തിൽ നിന്ന് പുറത്താക്കപ്പെട്ടു. സാമൂഹികമായ ബുദ്ധിമുട്ടുകൾക്കിടയിലും അവർ മകളെ പഠിപ്പിച്ചു. അമ്മ ഒരു ദേവദാസി ആയതിനാൽ ദേവദാസി സമൂഹവുമായി നല്ല അടുപ്പം പുലർത്താൻ മുത്തുലക്ഷ്മിക്ക് കഴിഞ്ഞു. മകൾക്കു പ്രായപൂർത്തിയായപ്പോൾ അമ്മ അവൾക്ക് യോജിച്ച വരനെ കണ്ടെത്താൻ ശ്രമിച്ചു. എന്നാൽ അവൾക്ക് പഠിക്കാനായിരുന്നു ആഗ്രഹം.