ഉഷ

ഇതിഹാസത്തിലെ സ്ത്രീകൾ

-  കണക്കൂർ ആർ. സുരേഷ്കുമാർ

ഇതിഹാസ കഥാപാത്രമായ ബാണാസുരന്റെ പുത്രിയാണ് ഉഷ. ഉഷയുടെയും അനിരുദ്ധന്റെയും പ്രണയകഥ വേറിട്ടു നിൽക്കുന്നതാണ്. പൊതുവെ നാം കേൾക്കുന്ന പ്രണയകഥകളിൽ കാമുകൻ കാമുകിയെ കടത്തി കൊണ്ടുപോകുന്നതാണല്ലോ. എന്നാൽ ഉഷയുടെ രസകരമായ കഥയിൽ കാമുകി കാമുകനെ കടത്തിക്കൊണ്ടു പോകുകയാണ്. മഹാബലി ചക്രവർത്തിയുടെ നൂറു പുത്രന്മാരിൽ പ്രധാനിയാണ് ബാണാസുരൻ, മഹാശക്തനായിരുന്ന ബാണാസുരൻ തപസ്സുചെയ്ത് ശിവഭഗവാനെ പ്രസാദിപ്പിച്ചു. വരം നൽകാമെന്നു സമ്മതിച്ച ശിവഭഗവാനോട് ബാണാസുരൻ ആവശ്യപ്പെട്ടത് തന്റെ കോട്ടവാതിൽക്കൽ കാവൽ നില്ക്കണമെന്നായിരുന്നു. അങ്ങനെ ശിവൻ പാർവ്വതിയുമായി ശോണിതപുരിയിലെ ബാണാസുരന്റെ കോട്ടവാതിലിൽ കാവൽ നിന്നു.

ശിവപാർവ്വതിമാരുടെ കാണുവാൻ ഇടവന്ന ബാണപുത്രി ഉഷ ഒരു പുരുഷസാമീപ്യം ആഗ്രഹിച്ചതാണ് പ്രേമസല്ലാപം സംഭവങ്ങളുടെ തുടക്കം. ഉഷയുടെ സ്വപ്നത്തിൽ ആ ദിവസം സുന്ദരനായ ഒരു യുവാവെത്തി. അവൾ ആ യുവാവുമായി പ്രണയ ലീലകളിൽ മുഴുകുന്നതൊകെ സ്വപ്നം കണ്ടു. ഉണർന്നു കഴിഞ്ഞിട്ടും സ്വപ്നത്തിന്റെ ആലസ്യം അവളെ വിട്ടൊഴിഞ്ഞില്ല. അവൾ ആകെ അനുരാഗ വിവശയായിക്കഴിഞ്ഞിരുന്നു.