ലിഖ്നെ വാലാ പോലീസ് വാലാ

കൈയക്ഷരം കൊണ്ടു റിക്കാർഡുകൾ വാരിക്കൂട്ടിയ ശ്യാമളൻ എന്ന അക്ഷര കലാ കാരന്റെ ജീവിതകഥ.

- ഉമ ആനന്ദ്

കൈരേഖ പോലെ കൈയക്ഷരവും ഓരോ വ്യക്തിയുടെയും സവിശേഷതയാണ്. കൈയക്ഷരത്തിൽ നിന്നും ഒരു വ്യക്തിയുടെ സ്വഭാവ വിശേഷങ്ങൾ വരെ കണ്ടെത്താനാവുന്ന തലത്തിലേക്ക് ശാസ്ത്രം പുരോഗമിച്ചു കഴിഞ്ഞു.

ചെറിയ ക്ലാസുകളിൽ കോപ്പി സമ്പ്രദായം കൊണ്ടുവന്നത് തന്നെ കൈയക്ഷരങ്ങൾക്ക് ഭംഗി കൂട്ടാനാണ്.

തലേലെഴുത്ത് എന്നത് ഒരു അശാസ്ത്രീയ സങ്കൽപ്പമാണങ്കിലും മനുഷ്യന്റെ ഭാഗ്യ നിർഭാഗ്യങ്ങളെ എഴുത്തുമായാണ് ബന്ധപ്പെടുത്തി യിരിക്കുന്നതെന്ന കാര്യം ശ്രദ്ധേയമാണ്.

മഹാന്മാർ ഉപയോഗിച്ച സാധന സാമഗ്രികളുടെ കൂടെ അവരുടെ കത്തുകളും പ്രദർശിപ്പിക്കുന്നത് കൈപ്പടയുടെ പ്രാധാന്യം വ്യക്തമാക്കുന്നു.

വല്ലഭന് പുല്ലുമായുധം എന്നതു പോലെ കൈയക്ഷരം കൊണ്ടു തന്നെ റികാർഡുകൾ വാരിക്കൂട്ടി യ ശ്യാമളൻ എന്ന അക്ഷ ര കലാകാരൻ സ്വന്തം കഥ പങ്കുവയ്ക്കുന്നു.

“ഞാൻ ജനിച്ചത് എറണാകുളം ചളിക്കവട്ടത്ത്, അച്ഛൻ പി.കെ. പരമുവിന്റെയും അമ്മ ലീലയുടേയും അഞ്ച് മക്കളിൽ നാലാമത്തെ മകൻ. പൊന്നുരുന്നിയിലായിരുന്നു സ്കൂൾ വിദ്യാഭ്യാസം. സ്കൂൾ വിട്ട് വന്ന് കളിയും കുളിയും കഴിക്കലുമെല്ലാം കഴിഞ്ഞാൽ അമ്മയാണ് വീട്ടിൽ പഠിപ്പിക്കുക. ചെറിയ ക്ലാസ് മുതലേ അമ്മ എന്നും പറയുന്ന ഒരു കാര്യമുണ്ട്. ഉരുട്ടിയുരുട്ടി എഴുതണം. പ്രത്യേകിച്ച് മലയാളം. ഇത് കേട്ട് കേട്ട് എനിക്ക് പ്രചോദനമായി. നാലാം ക്ലാസു മുതൽ എന്റെ കൈയക്ഷരത്തിന് നല്ല ചന്തം വച്ചു തുടങ്ങി.