മഹത് ഭാവമില്ലാത്ത മാഹാത്മ്യം

ശെൽവരാജിന്റെ പ്രസക്തി കേവലം അഭിമുഖങ്ങളിൽ മാത്രം ഒതുങ്ങി നിൽക്കുന്നതല്ല. അസാമാന്യമായ ഉൾക്കാമ്പുളള ലേഖനങ്ങൾ അദ്ദേഹം എഴുതാറുണ്ട്. അതിലുപരി കാലാതിവർത്തിയായ പുസ്തകങ്ങളും. ശാസ്ത്രസംബന്ധിയായ നിരവധി കൃതികളും അദ്ദേഹം പ്രസിദ്ധീകരിച്ചിട്ടുണ്ട്.

- സജിൽ ശ്രീധർ

വി.ഡി. ശെൽവരാജ് എന്ന നാമധേയം ഞാൻ ആദ്യമായി ശ്രദ്ധിക്കുന്നത് കലാകൗമുദിയുടെ താളുകളിൽ തന്നെയാണ്. പിന്നീട് അവരുടെ തന്നെ പല പ്രസിദ്ധീകരണങ്ങളിലും ഈ ബൈലൈൻ കണ്ടു. മലയാള മനോരമ മുഖ്യപത്രാധിപർ മാമ്മൻ മാത്യൂവുമായി ശെൽവ രാജ് തയ്യാറാക്കിയ ഒരു അഭിമുഖം വാസ്തവത്തിൽ എന്നെ ഞെട്ടിച്ചു കളഞ്ഞു. കാരണം അഭിമുഖസംഭാഷണം പലരും കരുതും പോലെ ഏത് പോലീസുകാരനും അനായാസം കൈകാര്യം ചെയ്യാവുന്ന ഒന്നല്ല. വേണ്ടത്ര ഗൃഹപാഠമോ അവബോധമോ സൂക്ഷ്മദൃഷ്ടിയോ വിശകലനശേഷിയോ ഒന്നുമില്ലാതെ വലിച്ചുവാരി അഭിമുഖം തയ്യാറാക്കുന്നവരുണ്ട്. വായിൽ തോന്നുന്നത് കോതയ്ക്ക് പാട്ട് എന്നതു പോലെ കുറെ ചോദ്യങ്ങൾ അതിനുളള ഉത്തരങ്ങൾ. അത് അതേപടി ടേപ്പ് റി കാർഡറിൽ നിന്ന് പകർത്തി വയ്ക്കും. ഒരു മുതിർന്ന മാധ്യമപ്രവർത്തകൻ തയ്യാറാക്കിയ ബാലിശവും വിരസവുമായ ഒരു അഭിമുഖം വായിച്ച് പരിഹാസകമന്റുകൾ പാസാക്കിയ ജേണലിസം ട്രെയിനികളെ ഇന്നും ഓർക്കുന്നു. പത്രപ്രവർത്തനം പഠിച്ചു എന്നതിനപ്പുറം ഉൾക്കാഴ്ചയില്ലാത്തവർ ആ മാധ്യമം കയ്യാളുമ്പോൾ സംഭവിക്കുന്ന ദുരന്തങ്ങളാണിതെല്ലാം.