മുറസാക്കി ഷിക്കിബു

4000 പേജുകളുള്ള വലിയൊരു രചനയാണ് ഗഞ്ചിയുടെ കഥ. ഒരു നൂറ്റാണ്ടിനുള്ളിൽ ആ പുസ്തകം ജാപ്പാനീസ് സാഹിത്യത്തിലെ ഒരു ക്ലാസിക്ക് രചനയായി മാറി. പിന്നീട് ഏറെ നൂറ്റാണ്ടുകൾക്കു ശേഷം, അതായത് ഇരുപതാം നൂറ്റാണ്ടിലാണ് ഗഞ്ചിയുടെ കഥ ഇംഗ്ലീഷിലേക്ക് വിവർത്തനം ചെയ്യപ്പെട്ടത്.

- കണക്കൂർ ആർ. സുരേഷ്കുമാർ

പതിനൊന്നാം നൂറ്റാണ്ടിൽ ജപ്പാനിൽ ജീവിച്ചിരുന്ന നോവലിസ്റ്റും കവയിത്രിയുമായിരുന്നു മുറസാക്കി ഷിക്കിബു രാജകുമാരി. ജപ്പാൻ ചരിത്രത്തിലെ ഹെയിൻ കാലഘട്ടത്തിലായിരുന്നു മുറസാക്കി ജീവിച്ചിരുന്നത്. അവളുടെ ജനന കാലഘട്ടമായപ്പൊഴേക്കും അവളുടെ പിതാവിന്റെ രാജവംശത്തിന് മുന്തിയ പദവികൾ നഷ്ടപ്പെടുകയും ചെറിയ പ്രവിശ്യ ഗവർണ്ണർ എന്ന നിലയിൽ എത്തിച്ചേരുകയും ചെയ്തിരുന്നു.

മുറസാക്കിയുടെ നോവലായ ഗഞ്ചിയുടെ കഥ അഥവാ "ദി ടെയിൽ ഓഫ് ഗഞ്ചി' എന്ന പുസ്തകത്തിനെ ലോകത്തിലെ ആദ്യത്തെ നോവലായി കണക്കാക്കുന്നു. ജാപ്പാനീസ് ഭാഷയിൽ ആയിരമാണ്ടിനും ആയിരത്തി പന്ത്രണ്ടിനും ഇടയിലാണ് ഈ നോവൽ രചിക്കപ്പെട്ടതെന്ന് കരുതപ്പെടുന്നു. മുറസാക്കി ഷിക്കിബു എന്നത് രാജകുമാരിയുടെ തൂലികാ നാമമാണ്. യഥാർത്ഥ പേര് ആധികാരികമായി എങ്ങും രേഖപ്പെടുത്തപ്പെട്ടിട്ടില്ല.

മുറസാക്കി വളർന്നു വന്ന കാലഘട്ടത്തിൽ ജപ്പാൻ ചൈനയുമായുള്ള നയതന്ത്രബന്ധങ്ങൾ കുറച്ചു തുടങ്ങിയിരുന്നു. ജപ്പാൻ സ്വന്തമായ ദേശീയ സംസ്കാരം ഉയർത്തിക്കൊണ്ടു വരുന്ന കാലമായിരുന്നു അത്. അതോടൊപ്പം, ജാപ്പാനീസ് ഭാഷ നല്ലവണ്ണം വേരുപിടിച്ചു വന്നു.