അമൃത ഷെർഗിൽ

വധുവിന്റെ ചമയം, ചന്തയിലേക്കു പോകുന്ന ദക്ഷിണേന്ത്യൻ ഗ്രാമീണർ തുടങ്ങിയ പല ചിത്രങ്ങളും അതീവ ശ്രദ്ധ നേടി. കഥകളി, ഭരതനാട്യം തുടങ്ങിയ കലാരൂപങ്ങൾ അവളെ ആകർഷിച്ചിരുന്നു. 1937-ൽ ഡൽഹിയിൽ നടത്തിയ പ്രദർശനവും അവളെ കൂടുതൽ പ്രശസ്തയാക്കി.

- കണക്കൂർ ആർ. സുരേഷ്കുമാർ

ഹംഗറിയിൽ ജനിച്ച ഇന്ത്യൻ വംശജയായ പ്രശസ്ത ചിത്രകാരിയായിരുന്നു അമൃത ഷെർഗിൽ. ഇന്ത്യൻ മോഡേൺ ആർട്ടിൽ ഉന്നത സ്ഥാനക്കാരിയായി കരുതപ്പെടുന്ന അമൃതയുടെ പെയ്ന്റിങ്ങുകൾ വിപണിയിൽ വിലയേറിയതാണ്.

1913 ജനുവരി മുപ്പതിന് ബുഡാപേസ്റ്റിൽ സിഖ് വംശീയനായ ഉംറാവു സിംഗ് ഷെർഗിലിന്റെ മകളായി അമൃത ജനിച്ചു. ഹംഗേറിയൻ ഓപ്പറ ഗായികയായ മരിയ അന്റോണിറ്റിയായിരുന്നു അമ്മ. അവർ ഉംറാവു സിംഗിന്റെ രണ്ടാംഭാര്യ ആയിരുന്നു. അമൃതയ്ക്ക് ഒരു അനുജത്തിയുമുണ്ടായി. മാതാപിതാക്കൾ അമൃതയെ റോമൻ കാത്തലിക് ആയി ജ്ഞാനസ്നാനപ്പെടുത്തിയെങ്കിലും അവൾ സ്വയം ഒരു മതത്തിലും വിശ്വസിച്ചിരുന്നില്ല.

തീരെ ചെറുപ്പത്തിൽ തന്നെ വീട്ടുവേലക്കാരുടെയൊക്കെ ചിത്രങ്ങൾ അവൾ വരച്ചു തുടങ്ങി. ചെറുപ്പകാലത്തെ ഹംഗറി ജീവിതം അവൾക്ക് ചിത്രകലയുടെ അടിത്തറ നൽകി. എന്നാൽ സാമ്പത്തിക ഞെരുക്കം കാരണം 1921 -ൽ ഷെർഗിൽ കുടുംബം ഹംഗറി വിട്ട് ഇന്ത്യയിലെത്തി. ഷിംലയിലെ ഒരു വില്ലയിലാണ് അവരെത്തിയത്.