ഇത് ഞങ്ങളുടെ കുടുംബചിത്രം അഞ്ജലി നായർ

ഭാഗ്യം കൊണ്ടാണ് ഇതുവരെ എല്ലാ സിനിമകളും എനിക്ക് ലഭിച്ചിട്ടുള്ളത്

- അപ്പൂസ്. കെ.എസ്

വ്യത്യസ്ത കഥാപാത്രങ്ങളിലൂടെ മലയാളസിനിമയിൽ പ്രതിഭ അടയാളപ്പെടുത്തിയ നടിയാണ് അഞ്ജലി നായർ. മലയാളത്തിലും തെന്നിന്ത്യൻ ഭാഷകളിലുമായി 125 ലേറെ സിനിമകളുടെ ഭാഗമായ അഞ്ജലിക്ക് ഏറെ കയ്യടി നേടിക്കൊടുത്തത് ജീത്തുജോസഫ് സംവിധാനം ചെയ്ത ദൃശ്യം 2 എന്ന ചിത്രമാണ്. ദൃശ്യം 2 വിലെ പോലീസ് വേഷം ഏറെ പ്രശംസ പിടിച്ചുപറ്റിയിരുന്നു. ഈ കഴിഞ്ഞ നവംബറിലാണ് അഞ്ജലി വീണ്ടും വിവാഹിതയായത്. സംവിധായകൻ അജിത് രാജുവാണ് അഞ്ജലിയെ വിവാഹം കഴിച്ചത്. ആവനി, ആദ്വിക എന്നിവരാണ് മക്കൾ. മൂത്തമകൾ ആവനി അഞ്ചാം ക്ലാസിൽ പഠിക്കുന്നു. ആദ്വിക ജനിച്ചത് ഇക്കഴിഞ്ഞ ജൂലൈ മാസത്തിലാണ്. അഞ്ച് സുന്ദരികൾ, എ.ബി.സി.ഡി, ലൈ ഓലൈ, കമ്മട്ടിപ്പാടം, കനൽ, ഒപ്പം, പുലിമുരുകൻ, ടേക്ക് ഓഫ്, ദൃശ്യം 2, കാവൽ, അണ്ണാത്തെ തുടങ്ങി നിരവധി ഹിറ്റ് സിനിമകളുടെ ഭാഗമായി നടി അഞ്ജലി നായരുടെ കുടുംബവിശേഷങ്ങളിലൂടെ...

അഭിനയവും കുടുംബ ജീവിതവും

അഞ്ജലി: കുടുംബജീവിതത്തിന് ഒരുപാട് പ്രാധാന്യം നൽകുന്ന ആളാണ് ഞാൻ. എപ്പോഴും ഫാമിലിക്കൊപ്പം നിൽക്കാൻ ഇഷ്ടമുള്ളയാൾ. ഇളയ മകൾ വന്നതിനു ശേഷം ഏറ്റവുമധികം സമയം ചെലവഴിക്കുന്നത് കുടുംബത്തോടൊപ്പമാണ്. ആവ്നിയും അജിയേട്ടനും ആദ്വികയുമുള്ള ഏറെ സന്തോഷമുള്ള ഒരു കുടുംബം. ജീവിതത്തിൽ എനിക്കുവേണ്ടി എഴുതിവച്ച ഒരു പേരാണ് അജിത്ത്. ഏട്ടൻ അഭിനയത്തിന്റെ കാര്യത്തിൽ മാത്രമല്ല, മറ്റെല്ലാ കാര്യങ്ങൾക്കും എന്നെ ഒരുപാട് സപ്പോർട്ട് ചെയ്യുന്ന വ്യക്തിയാണ്. എന്റെ ഒരാഗ്രഹത്തിനും അദ്ദേഹം തടസ്സം നിന്നിട്ടില്ല. മക്കളുടെ കാര്യമായാലും എന്റെ കാര്യമാണെങ്കിലും എല്ലാത്തിനും വളരെയധികം പ്രാധാന്യം നൽകുന്ന ഒരാളാണ് അജിയേട്ടൻ.

അഞ്ജലിയുടെ പുതിയ പ്രോജക്ടുകൾ

ലാലേട്ടൻ നായകനായ മോൺസ്റ്ററാണ് അവസാനം റിലീസായ ചിത്രം. ഒരു തമിഴ് ചിത്രത്തിൽ അഭിനയിച്ചുകഴിഞ്ഞു. മകൾ ആവനി അഭിനയിക്കുന്ന ആദിയും അമ്മുവും എന്ന ചിത്രത്തിൽ ആവ്നിയുടെ അമ്മയുടെ വേഷത്തിലും അഭിനയിച്ചിരുന്നു.

അജിത്തിന്റെ ലൊക്കേഷൻ

 അജിത്. ഞാൻ ഒരു പരസ്യ സംവിധായകനാണ്. സിനിമ ചെയ്യാനുള്ള പ്ലാനാണ് ഇപ്പോഴുള്ളത്.അടുത്തവർഷം എന്റേതായൊരു സിനിമ പുറത്തിറങ്ങുമെന്ന് പ്രതീക്ഷിക്കുന്നു. രണ്ടുമൂന്ന് കഥകൾ ലൈനപ്പിൽ നിൽക്കുന്നുണ്ട്. മറ്റൊരു കാര്യം ഇതിൽ ഒരു സിനിമയുടെ സ്ക്രിപ്റ്റ് റൈറ്റർ അഞ്ജലിയാണ് എന്നതാണ്.