സമർപ്പണ ഭാവത്തിൽ 'വേളി'

ശബരിമല മേൽശാന്തി അരുൺകുമാർ നമ്പൂതിരിയുടെ ഭാര്യ അമ്പിളി മഹിളാരത്നത്തോട്....

- പി. ജയചന്ദ്രൻ

ഭഗവത്പൂജ തൊഴിലായി സ്വീകരിച്ചിട്ടുള്ള ഏതൊരു കേരളീയ ബ്രാഹ്മണന്റേയും ഏറ്റവും വലിയ ആഗ്രഹമോ അഭിലാഷമോ ആണ് ഒരു ദിവസമെങ്കിൽ ഒരു ദിവസമെങ്കിലും കാനനവാസനായ ശബരിമല അയ്യപ്പന് പൂജ ചെയ്യുവാനുള്ള അവസരം ലഭിക്കുക എന്നുള്ളത്. കൊല്ലം നീണ്ടകര തോട്ടത്തിൽ മഠത്തിൽ ശങ്കരൻ നമ്പൂതിരിയുടേയും രാജമ്മ അന്തർജ്ജനത്തിന്റെയും ഇളയമകൻ അരുൺകുമാർ നമ്പൂതിരിക്കുമുണ്ടായിരുന്നു അങ്ങനൊരാഗ്രഹം. അച്ഛനിൽ നിന്ന് പൂജാകാര്യങ്ങളിലെ ബാലപാഠവും, തുടർന്ന് പത്തനംതിട്ട പാലമുറ്റം തന്തിയിൽ നിന്നും അമ്പലപ്പുഴ പുതു മന തന്ത്രിയിൽ നിന്നുമായി താന്ത്രികവിദ്യയിൽ പ്രാവീണ്യവും നേടിയ ശേഷം, മുത്തച്ഛന്റെ കാലത്ത് ദേവസ്വം ബോർഡിന് വിട്ടുകൊടുത്ത വീടിനടുത്തുള്ള ക്ഷേത്രത്തിൽ തന്നെ പൂജാരിയായി തുടങ്ങിയ കാലം മുതൽ മനസ്സിൽ വളർന്ന ആഗ്രഹം.

നെടുനാളത്തെ കാത്തി രിപ്പിനുശേഷം ആ സൗഭാഗ്യം ഇപ്പോൾ കൈവന്നപ്പോൾ അതിന് അരുൺകുമാർ നമ്പൂതിരി നന്ദിപൂർവ്വം സ്മരിക്കുന്ന കുറെപ്പേരുണ്ട്. പൂർവ്വപിതാമഹൻമാർ, താൻ തന്നെ പൂജ കഴിച്ചിട്ടുള്ള, ആറ്റുകാൽ ഉൾപ്പെടെയുള്ള ക്ഷേത്രങ്ങളിലെ മൂർത്തി കൾ, പുണ്യമായി പിറന്ന തന്റെ മക്കൾ.. അങ്ങനെ പലരും. അക്കൂട്ടത്തിൽ എടുത്തുപറയേണ്ടുന്ന ഒരു പേരാണ് ഭാര്യ അമ്പിളിയുടേത്.

അടൂർ ഏഴംകുളം ശാന്തിമഠത്തിൽ കൊടുമൺ ശങ്കരൻ പോറ്റിയുടെയും സുഭദ്രാ അന്തർജ്ജനത്തിന്റേയും മകൾ അമ്പിളി തന്റെ വേളിയായി തോട്ടത്തിൽ മഠത്തിലേക്ക് വലതുകാൽ വച്ച് കയറി വന്നതുമുതൽ പല രൂപത്തിൽ ഐശ്വര്യവും കടന്നു വന്നു എന്നാണ് അരുൺകുമാർ വിശ്വസിക്കുന്നത്.

ലോകത്തുതന്നെ ഏറ്റവും കൂടുതൽ സ്ത്രീകൾ ദേവിപ്രീതിക്കായി ഒരേ ദിവസം ഒറ്റ സ്ഥലത്തു തന്നെ പൊങ്കാലയർപ്പിക്കുന്നതിലൂടെ വിശ്വപ്രസിദ്ധിയാർജ്ജിച്ചിട്ടുള്ള ആറ്റുകാൽ ക്ഷേത്രത്തിന്റെ ചരിത്രത്തിലാദ്യമായി തുടർച്ചയായി രണ്ടുവർഷം നറുക്കെടുപ്പിലൂടെ ദേവിയെ പൂജിക്കുവാൻ കിട്ടിയ അവസരവും, ഇപ്പോൾ ചിരകാലാഭിലാഷമായിരുന്ന ശബരിമല മേൽശാന്തി പദം തേടിയെത്തിയതുമൊക്കെ അമ്പിളിയുടെ കൂടി മനസ്സറിഞ്ഞുള്ള പ്രാർത്ഥനയുടെ ഫലമാണെന്ന് വിശ്വസിക്കുവാനാണ് അരുൺകുമാർ നമ്പൂതിരിക്ക് താൽപ്പര്യം.