മനസ്സും ആരോഗ്വവും സംരക്ഷിക്കപ്പെടണം

മംമ്താ മോഹൻദാസ്

- പ്രീത അജയ്

സംവിധായകൻ ഹരിഹരൻ കണ്ടെത്തിയ അഭിനേത്രിയാണ് മമതാ മോഹൻദാസ്. "മയൂഖം' എന്ന ഹരിഹരൻ ചിത്രത്തിൽ നായികയായി എത്തിയ മമത ഏതാനും മലയാളസിനിമകളിൽ കൂടി അഭിനയിച്ചതോടെ തമിഴ് സിനിമാക്കാരുടെയും ശ്രദ്ധയാകർഷിച്ചു. അങ്ങനെ തമിഴിൽ വിശാലിന്റെ നായികയായി "ശിവപ്രതികാരം' എന്ന സിനിമയിൽ അഭിനയിച്ചതോടെ തമിഴിൽ മാത്രമല്ല തെലുങ്കിലും മമതയ്ക്ക് ചുവടുവയ്ക്കാനായി. എന്നിരുന്നാലും മലയാളത്തിലായിരുന്നു പൂർണ്ണ ശ്രദ്ധ. തമിഴിൽ ഏറ്റവും ഒടുവിലായി വിജയ് സേതുപതിക്കൊപ്പം അഭിനയിച്ച "മഹാരാജാ' വൻവിജയമായിരുന്നു.അടുത്തിടെ മമതയോട് അൽപ്പനേരം സംസാരിക്കുവാൻ അവസരം കിട്ടി. ആ സംഭാഷണത്തിലെ ഹ്രസ്വഭാഗങ്ങൾ...

പതിനെട്ട് വർഷത്തെ മമതയുടെ സിനിമാജീവിത അനുഭവം എങ്ങനെയുണ്ട്...?

മമത; നന്നായി പോകുന്നു. ഞാൻ അഭിനയം തുടങ്ങിയിട്ട് പതിനെട്ട് വർഷം കഴിഞ്ഞു എന്നത് എനിക്കു തന്നെ വിശ്വസിക്കാനാവുന്നില്ല. ഇടയ്ക്ക് പല കാരണങ്ങളാൽ കരിയറിൽ ചെറിയ ബ്രേക്ക് ഉണ്ടായി. കോവിഡ് ലോക്ക്ഡൗണിലും രണ്ടുവർഷം നഷ്ടപ്പെട്ടു. എങ്കിലും ഫീൽഡിൽ വർഷങ്ങളായി നായിക യായി തന്നെ തുടരാനാവുന്നു എന്നത് സന്തോഷം പകരുന്നു. അത് വലിയ കാര്യം തന്നെ. അതേസമയം ഞാൻ മാത്രമല്ല ഈ “അച്ചീവ്മെന്റ്' നടത്തിയിട്ടുള്ളത്. എന്നെപ്പോലെ ഒട്ടേറെ ഹീറോയിൻസ് ഇൻഡസ്ട്രിയിൽ ഫ്രഷായി തന്നെ തുടരുന്നുണ്ട്.