ഇത് ഞാൻ ആഗ്രഹിച്ച കൂട്ട്

എന്നെപ്പോലെയൊരാൾക്ക് വിവാഹം എന്ന ആഗ്രഹമേ പാടില്ല എന്നൊക്കെയാണ് പലരും കരുതുന്നത്, അത് അങ്ങനെയല്ല എന്ന് പറയാൻ ഇതിലും മികച്ചൊരു അവസരമില്ല...

- ശ്യാമ

പൊള്ളലേറ്റ ഒരാൾ മോഡലിങ് ചെയ്യുന്നു. ജോലി ചെയ്യുന്നു എന്നൊക്കെ കാര്യമായി പറയും. പക്ഷേ, അവർ വിവാഹം എന്ന സ്വപ്നം പങ്കുവയ്ക്കുമ്പോൾ ഒപ്പം നിൽക്കുന്നവർ പോലും പല സംശയങ്ങളും മുന്നിലേക്കിടും. വിവാഹം, പ്രണയം എന്നതൊക്കെ മുഖം നോക്കി ചെയ്യേണ്ടതല്ല എന്നു പറയുന്നവർ കുറച്ചെങ്കിലും ഉണ്ട് എന്നും സമ്മതിക്കുന്നു. പക്ഷേ, നോർമലൈസ് ചെയ്തു വച്ച ഉടലാകൃതിയിൽ നിന്ന് അൽപമൊന്നു മാറിയാൽ സ്നേഹത്തിനു പകരം മിക്കവാറും ഇടങ്ങളിൽ സിംപതി നോട്ടങ്ങൾ' ആണു വന്നു നിറയുക. അതുകൊണ്ടു തന്നെയാണു കുമളി സ്വദേശി സൂസന്റെ കല്യാണം വായിക്കപ്പെടേണ്ടത്. ഇതും നോർമലൈസ് ചെയ്യപ്പെടേണ്ടത്.

ഞാൻ എന്നെ വാർത്തെടുത്തു

“പൊള്ളലേറ്റ് ആദ്യ സമയത്തു ഞാൻ ഇങ്ങനെയായിരുന്നില്ല. അങ്ങനെയൊരു അപകടം എനിക്കു സംഭവിച്ചു എന്ന് അംഗീകരിക്കാൻ തന്നെ പ്രയാസം. രണ്ടു വർഷത്തോളം വീട്ടിനുള്ളിൽ നിന്നു പുറത്തിറങ്ങിയില്ല. ഒരു സ്പൂൺ പോലും സ്വയം എടുക്കാൻ പറ്റാത്ത അവസ്ഥ. അത്രയും നാൾ വീട്ടിൽ തന്നെ കഴിഞ്ഞ ശേഷം സ്വയം വന്ന ചിന്തയിലൂടെയാണ് എനിക്ക് മാറ്റം വേണം എന്ന്തോന്നിയത്. ചെറിയ ജോലികൾ ചെയ്യാൻ തുടങ്ങി. ആദ്യം ബുദ്ധിമുട്ടിയെങ്കിലും ഓരോ കുഞ്ഞു കാര്യങ്ങളും എനിക്കു ചെയ്യാൻ പറ്റും എന്നു മനസ്സിലാക്കിയതു വലിയ സന്തോഷമായിരുന്നു. തുടക്കത്തിൽ സ്പൂൺ എടുക്കാൻ പറ്റുന്നതു പോലും ആഘോഷമായി തോന്നി.