தெய்வத் திருமகள்!

கேரளாவில் உள்ள திருச்சூரில் வசித்து வரும் ஓர் அழகான குடும்பத்துக்குச் சொந்தக்காரர், பிரதீஷ்

- த.சக்திவேல்

அவருக்கு தன்யா என்ற மனைவியும், தேவானந்தா என்ற மகளும், அதிநாத் என்ற மகனும் உள்ளனர். உள்ளூரிலேயே ஒரு கடையைக் குத்தகைக்கு எடுத்து, இன்டர்நெட் மையத்தை நடத்தி வந்தார் பிரதீஷ். 

கடந்த அக்டோபர் வரையிலும் மகிழ்ச்சியாலும், அமைதியாலும் நிரம்பியிருந்தது அவரது குடும்பம். வெளிச்சம் மட்டுமே ஊடுருவியிருந்த பிரதீஷின் வீட்டுக்குள் மெல்ல, மெல்ல இருள் கசியத் தொடங்கியது.

அடுத்த சில நாட்களில் நிலைகுலைந்துபோனது பிரதீஷின் குடும்பம்.

ஆம்; அக்டோபர் மாதத்தின் ஒரு நாள். இரவு தூக்கத்திலிருந்து காலையில் எழுந்தார் பிரதீஷ். அவரால் சரியாகப் பேசமுடியவில்லை. பேச முயன்றும் வார்த்தைகள் வெளிவரத் திணறியது.

எந்நேரமும் சுறுசுறுப்பாக இயங்கிக்கொண்டிருந்தவர் அவர். அன்று நாள் முழுவதும் சோர்வாக இருந்தார். முன்பு போல எந்த வேலையையும் அவரால் செய்ய இயலவில்லை. சில நேரங்களில் அவரது உணர்வுநிலைகூட சரியாக இயங்கவில்லை. மட்டுமல்ல, இரண்டு கால்களும் வீக்கமடைந்தன. எழுந்து நடக்கவே கடினப்பட்டார்.

தனது உடலுக்கு என்ன நேர்ந்தது என்று அவராலும், குடும்பத்தினராலும் யூகிக்கக்கூட முடியவில்லை. இத்தனைக்கும் அவரது வயது 48தான். மதுப்பழக்கம் இல்லாதவர்.

உடனடியாக கொச்சியில் உள்ள ராஜகிரி மருத்துவமனைக்கு விரைந்தது அவரது குடும்பம். ராமச்சந்திரன் நாராயணமேனன் என்ற உறுப்பு மாற்று அறுவை சிகிச்சை நிபுணரின் தலைமையில் சிகிச்சைகள் மேற்கொள்ளப்பட்டன.

முதலில் துரித நேரத்தில் பல பரிசோதனைகள் செய்யப்பட்டன. அவருக்குக் கல்லீரல் புற்றுநோய் இருப்பது தெரியவந்தது. மட்டுமல்ல, கல்லீரலைச் சுற்றி கொழுப்பு வேறு படிந்திருந்தது. பிரதீஷின் வருமானத்தையும், ஆதரவையும், இருப்பையும் நம்பியிருந்த குடும்பம் முழுவதுமாக இருளில் மூழ்கியது.

கல்லீரல் மாற்று அறுவை சிகிச்சை மட்டுமே பிரதீஷின் உயிரைக் காப்பாற்றுவதற்கான ஒரே வழி. அதையும் விரைவில் செய்ய வேண்டும். இல்லையென்றால் அதிகபட்சமாக ஆறு மாதங்கள் மட்டுமே பிரதீஷால் உயிருடன் இருக்க முடியும்.

பிரதீஷின் குடும்பம் இருளிலிருந்து வெளிச்சத்துக்குத் திரும்ப வேண்டுமானால், அவர்கள் இரண்டு போராட்டங்களை வெற்றிகொள்ள வேண்டும்.

முதலாவது, பிரதீஷுக்குப் பொருத்தமான கல்லீரலை தானமாகக் கொடுக்க முன்வருபவரைக் கண்டுபிடிக்க வேண்டும். அதுவும் ஒரு சில நாட்களில்.