ઘણું કરવા જેવું રહી ગયું... ઘણું ન કરવા જેવું થઈ ગયું!

બજેટ અને એ પછીના બે દિવસ શૅરબજાર નીચે ગયા પછી ભલે ફરી ઉછાળા મારતું થયું, બજેટની જાહેરાતો પણ લાંબે ગાળે ભલે અર્થતંત્રને વેગ આપશે એવો દાવો કરાય, અત્યારે તો બજેટની કેટલીક જોગવાઈએ નારાજગી અને નિરુત્સાહની લાગણી ઊભી કરી છે.

- જયેશ ચિતલિયા

કેન્દ્રીય બજેટ ખરેખર કેવું છે એનો ઉઘાડ બજેટના બીજા દિવસથી વધુ ને વધુ થતો રહ્યો છે. બજેટની ફાઈન પ્રિન્ટ સ્પષ્ટ થતી જતાં એ મુજબના પ્રતિભાવ-પ્રત્યાઘાત પણ આવતા થયા છે. શરૂમાં બજેટની પ્રશંસા તો થઈ ગઈ, અલબત્ત, ઘણી બાબતો બિરદાવવા જેવી ખરી, પરંતુ બજેટના ઉઘાડમાં ઘણું એવું પણ બહાર આવ્યું છે, જે આવકાર્ય નથી અને આંચકાજનક પણ છે. નાણાપ્રધાન નિર્મલા સીતારમણ એ મામલે સકારાત્મક અભિગમ સાથે આગળ વધી શક્યાં હોત, ખાસ તો અર્થતંત્રને ઉત્તેજન આપવાની અને એ માટે ઈન્વેસ્ટમેન્ટ માહોલને પણ પ્રોત્સાહન આપવાની આવશ્યકતા છે ત્યારે નાણાપ્રધાને કેટલીક જોગવાઈ ટાળવા જેવી અને કેટલીક ઉમેરવા જેવી હતી.

રોજગાર સર્જનના પ્લાન સામે સવાલ

ચાર્ટર્ડ એકાઉન્ટન્ટ શાર્દુલ શાહ ચિત્રલેખા સાથેની વાતચીતમાં ચોક્કસ નકારાત્મક અથવા આવકાર્ય ન ગણાય એવી બાબતો પ્રત્યે ધ્યાન દોરતાં કહે છેઃ ‘રોજગાર સર્જન પર જોર આપવાનો પ્રયાસ બજેટમાં થયો છે, પણ ઈન્ટર્નશિપ માટે સરકારે પાંચસો કંપનીઓને મર્યાદિત રાખી છે એમાં વધુ કંપનીઓનો સમાવેશ કરવો જોઈતો હતો તેમ જ એની વળતરની રકમ ૫૦૦૦ રૂપિયા નિયત કરી છે અને એ માટે સીએસઆર ફંડમાંથી ૧૦ ટકા ફંડ વાપરવાની છૂટ આપી છે, પરંતુ આ સ્કીમનો અમલ પડકારરૂપ લાગે છે. આના પર વધુ અભ્યાસ કરીને પગલાં લેવાની જરૂર હતી.’