കളമൊഴിഞ്ഞ് ടെന്നിസ് രാജാവ്

ഡേവിസ് കപ്പിലെ തോൽവിയോടെ നദാലിന് പടിയിറക്കം

മലാഗ (സ്പെയിൻ): സ്പാനിഷ് ടെന്നിസ് ഇതിഹാസം റാഫേൽ നദാൽ അവസാന മത്സരവും കളിച്ച് കളം വിട്ടു. വിടവാങ്ങൽ ടൂർണമെന്റായി 38കാരൻ നേരത്തേ പ്രഖ്യാപിച്ച ഡേവിസ് കപ്പിലെ തോൽവിയോടെയാണ് പടിയിറക്കം. നെതർലൻഡ്സിനോട് 2-1ന് പരാജയപ്പെട്ട് സ്പെയിൻ ക്വാർട്ടർ ഫൈനലിൽ പുറത്താവുകയായിരുന്നു. നദാലിന്റെ രണ്ട് പതിറ്റാണ്ട് നീണ്ട ടെന്നിസ് കരിയറിനും ഇതോടെ വിരാമമായി. മലാഗയിൽ ഡെച്ച് താരം ബോട്ടിക് വാൻ ഡി സാൻഡ്ഷെൽപ്പാണ് നദാലിനെ പരാജയപ്പെടുത്തിയത്. സ്കോർ 4-6, 4-6.