മൻമോഹൻ സിങ് വിടവാങ്ങി

വ്യാഴാഴ്ച രാത്രി 9.51നായിരുന്നു മുൻ പ്രധാനമന്ത്രിയുടെ അന്ത്യം

ന്യൂഡൽഹി: മുൻ പ്രധാനമന്ത്രിയും കോൺഗ്രസ് നേതാവുമായ ഡോ. മൻമോഹൻ സിങ് (92) അന്തരിച്ചു. ആരോഗ്യനില വഷളായതിനെതുടർന്ന് വ്യാഴാഴ്ച രാത്രി എട്ടോടെ ഡൽഹി എയിംസിൽ പ്രവേശിപ്പിച്ച അദ്ദേഹം രാത്രി 9.51ന് അന്ത്യശ്വാസം വലിച്ചു. 2004 മുതൽ 2014 വരെ ഇന്ത്യൻ പ്രധാനമന്ത്രിയായിരുന്ന മൻമോഹൻ സിങ് ലോകത്തിലെ മികച്ച സാമ്പത്തിക വിദഗ്ധരിലൊരാളായിരുന്നു. റിസർവ് ബാങ്ക് ഗവർണർ, ആസൂത്രണ കമീഷൻ ഡെപ്യൂട്ടി ചെയർമാൻ, ധനമന്ത്രാലയത്തിലെ മുഖ്യ സാമ്പത്തിക ഉപദേഷ്ടാവ്, ധനമന്ത്രാലയ സെക്രട്ടറി, പ്രധാനമന്ത്രിയുടെ സാമ്പത്തിക ഉപദേഷ്ടാവ് തുടങ്ങിയ സ്ഥാനങ്ങളിലെല്ലാം മികവ് തെളിയിച്ചശേഷമാണ് മൻമോഹൻ സിങ് ധനമന്ത്രിയും പിന്നീട് പ്രധാനമന്ത്രിയുമാകുന്നത്.