இஸ்லாமியர்களின் உரிமையை பாதிக்கும் வக்பு திருத்த மசோதாவுக்கு எதிராக தமிழக சட்டசபையில் ஸ்டாலின் தீர்மானம்!

"மத்திய அரசு முழுமையாக வாபஸ் பெற வேண்டும்”

- 

அ.தி.மு.க., பா.ம.க. ஆதரவு; பா.ஜ.க. வெளிநடப்பு!!

இஸ்லாமியர்களின் உரிமையை பாதிக்கும் வக்பு திருத்த மசோதா வுக்கு எதிராக தமிழக சட்டசபையில் முதலமைச்சர் மு.க.ஸ்டாலின் கொண்டு வந்த தீர்மானம் நிறைவேற்றப்பட்டது. இந்த தீர்மானத்திற்கு அ.தி.மு.க., பா.ம.க. உள்ளிட்ட கட்சிகள் ஆதரவு தெரிவித்தன. பா.ஜ.க. எதிர்ப்பு தெரியத்தி வெளிநடப்பு செய்தது.

மத்திய அரசுப் பாராளுமன்றத்தில் அறிமுகம் செய்துள்ள வக்பு சட்டத் திருத்த - முன்வடிவை முழுமையாக வாபஸ் பெற வேண்டும் என்று வலியுறுத்தி தமிழக சட்டசபையில் இன்று முதலமைச்சர் மு.க.ஸ்டாலின் தனித் தீர்மானம் கொண்டு வந்தார். அப்போது அவர் பேசியதாவது:

வேற்றுமையில் ஒற்றுமை கண்டு நாட்டு மக்கள் ஒற்றுமை அனைவரும் உணர்வுடன் வாழும் நாடு இந்திய நாடு. பல்வேறு இனங்கள், மொழிகள், மதங்கள், வழிபாட்டு நம்பிக்கைகள், பண்பாடுகள் இருப்பினும் அனைவரும் இந்திய மக்கள் நாட்டுமக்களாக என்ற உண்மை உணர்வோடு வாழ்ந்து வருகிறார்கள். இதற்கேட்ட நாட்டை ஆளும் அரசும் இத்தகைய உணர்வைக் கொண்ட அரசாகத்தான் செயல்பட வேண்டும். ஆனால் ஒன்றியத்தில் பா.ஜ.க. தலைமையிலான கூட்டணி அரசானது, தனது செயல்பாடுகளை அனைத்தையும் ஒருவிதமான உள்நோக்கம் கொண்டதாகச் செய்து வருகிறது. எதைச் செய்தாலும் குறிப்பிட்ட தரப்பை வஞ்சிக்கும் வகையில்தான் திட்டங்களை தீட்டுகிறார்கள்.