வாய்ப்புகள் கிடைத்தும் நடிக்க மறுத்தேன்: பாவனா

தமிழ்த் திரையுலகில் ‘சித்திரம் பேசுதடி’ படத்தின் மூலம் அறிமுகமானவர் நடிகை பாவனா.

அப்படத்திற்குப் பிறகு ‘வெயில்’, ‘ஜெயம் கொண்டான்’, ‘தீபாவளி’ போன்ற படங்களில் நடித்து ரசிகர்கள் மத்தியில் அவர் பிரபலமானார். கடைசியாக அஜித் நடிப்பில் வெளியான ‘அசல்’ படத்தில் அவர் நடித்திருந்தார்.

15 ஆண்டுகள் இடைவெளிக்குப் பிறகு ‘தி டோர்’ படத்தின் மூலம் தமிழ் திரையுலகில் மீண்டும் வலம்வர இருக்கிறார் பாவனா.

அவரிடம் தமிழ் ஊடகம் ஒன்று அண்மையில் நடத்திய நேர்காணலின் சில தகவல்களை இங்கு காணலாம்.

‘சித்திரம் பேசுதடி’ படத்தின் மூலமாகத் தமிழ் மொழிக்கு அறிமுகமான எனக்கு அது முதல் வாய்ப்பில்லை எனப் பேசத் தொடங்கிய பாவனா, அப்படத்திற்கு முன்பு தமிழ்த் திரையுலகில் கிடைத்த வாய்ப்புகள் அனைத்தையும் தான் நிராகரித்ததாகக் கூறினார்.